ОПИСАНЬЕ И ОБОРОНА СЪБОРУ РУСКОГО БЕРЕСТЕЙСКОГО, въ року 1596, мѣсеца октебра, пристойне одъ старъшихъ згромажоного
У Вильни. Року БОЖЕГО НАРОЖЕНЬЯ 1597.
Матфей 18:20
«Идѣже еста два или трие събрани во имя Мое, ту есмь посредѣ ихъ».
_______
ПРЕДЪМОВА ДО ЧЫТЕЛЬНИКА.
Много речы есть, чытельнику ласкавый, которыми Господь Богъ тыхъ нашыхъ часовъ церковь Свою, одъ еретыковъ утрапеную, потешыть рачылъ. Однакъ две суть особливые: навороченье новыхъ панъствъ до веры християньское а водноченье стародавныхъ християнъ. Абовѣмъ якъ скоро ересь к розъмаитые блюзнерства въ тыхъ нашыхъ краехъ повставати почали, обратилъсе Господь Богъ до поганъ, до Инъдни, до Япону, до Хины, то есть до таковыхъ людей, которые евангелия светого николи не слышели, и оные черезъ слуги Свое прылучывъ до одного стада Своего и одного пастыра, которого Онъ преложылъ надъ овечъками Своими. О чомъ зъ нашою немалою потехою слышалисмо, коли тамътые королеве послы свое зъ великимъ набоженствомъ до Рыму послали, абы послушеньство бискупу Рымъскому, яко на местъцу Христо-
