го, и каноновъ святыхъ отцевъ вцалѣ заховали и отправовани были. И просилъ насъ, господара, абыхмы его мил. того въ панствахъ нашихъ позволили. А такъ мы, будучи звирхнимъ оборонцею костеловъ и церквей Божіихъ и розмноженья вшелякого порядку въ церквахъ закону христіанского, видячи въ томъ прозбу его мил. отца патріархи быти слушную, за радою пановъ радъ нашихъ, на тотъ часъ при насъ будучихъ, тогосмы его мил. позволили: ведлугъ власти закону своего Греческого, всѣ справы церковный, духовенству его мил. зъ давныхъ часовъ въ панствахъ нашихъ належачіи, отправовати; всѣхъ духовныхъ закону Греческого, отъ найстаршего ажъ до найнижшего стану, въ власти и въ послушенствѣ своемъ мѣти, судити, рядити, справовати, и выступного каждого, ведлугъ духовенства своего и правилъ святыхъ отцевъ, карати. Прото абы каждый урядъ и зверхность духовная и свѣтская въ томъ панствѣ нашемъ вел. княз. Лит. и въ всѣхъ краехъ Рускихъ, тому панству нашему прислухаючихъ, такъ въ замкахъ, въ мѣстахъ, мѣстечкахъ и селахъ нашихъ господарскихъ, княжихъ, паньскихъ, земянскихъ, духовныхъ и свѣтскихъ, — о томъ вѣдаючи, боронити и ни якое переказы его милости отцу патріарсѣ въ ростяганью владности, въ справахъ его мил. духовныхъ чинити не мѣли, для ласки нашей господарской и подъ виною на таковыхъ, кто бы росказанья нашего не былъ послушенъ, въ статутѣ описаною. А ижъ бы то ку вѣдомости всѣмъ приходило, хочемо мѣти, абы в. мил. панове воеводове, старостове, державцы наши, а намѣстникомъ ихъ мил. приказуемо, абысте тотъ нашъ листъ вездѣ, гдѣ того потреба будеть, обволати и, копѣи зъ него списуючи,
