епископа (для розъсудку) не могутъ се удавать, бо то Рымскому осудить належить».
Въ светом вселенскомъ соборе Ниценьскомъ второмъ: «зложеный епископъ, если не полюбить суду ихъ, будеть апелевать, тогды маетъ тотъ соборъ судовый, митрополитъ и епископы отсылаючы до Рымъского, тотъ весь судъ выписать, для чого и яко осудили его».
О Грекахъ и патріархахъ Царогородскихъ, яко долго въ единности церковной и подъ послушенствомъ папежскимъ жыли, яко се отъ него одриваючи зась ворочалисе.
Роздѣлъ 7.Черезъ тисечу летъ близко Кгрекове зъ своимъ патриярхою въ единъности костельной и подъ послушенствомъ бискуповъ Рымскихъ зоставали (окромъ часовъ геретыцкихъ, Арияньскихь и образоборцовь, въ которыхъ неспокойные замешки, але вельми коротко, бывали). Бо семъ соборовъ повышехныхъ сполъне зъ собою въ згоде и единъности отправили, такъ Възходные, яко и Заходные епископы. Семый противъ образоборъцомъ Ниценъский вторый чинили, року семъ сотъ деветдесятого, за часу Андрияна папежа. На всихъ семи светыхъ соборахъ перъшое местьце мелъ (и заседалъ) пала (Римский, а въ небытности его) послове его, и онъ, (то есть папа Рымский Игнатей,) за позволеньемъ цесаровъ вси съборы складалъ, и зъехатьсе на нихъ росказовалъ, а што оные отцове постановили, на то потверженья его завжды просили. Што
