Старонка:Збор твораў (Бядуля, 1937). Том I.pdf/80

∗∗∗

Я пайшоў у сыр-бор,
Дзе гняздзяцца арлы,
Аб дзяўчыне маёй
Каб не слухаць хвалы,

Каб для сэрца знайсці
Адпачын-супакой
Сярод пушчы нямой,
Сярод гушчы глухой.

Там забуду ўначы,
У лясной цішыні
Аб дзявочай красе,
Аб сардэчным агні.

Я пайшоў у сыр-бор
Гаіць раны душы
Пад мяцеліцай зор,
Пад віхурай цішы.

Наўмысне сыр-бор
Мне аб ёй гаманіў,
Аб ёй мшалы курган
Казкі дзіўныя сніў.