Перайсці да зместу

Старонка:Збор твораў (Бядуля, 1937). Том I.pdf/45

З пляцоўкі Вікікрыніцы
Гэта старонка не была вычытаная

МОЖА БЫЦЬ…

Можа быць, што пятлю мне
Надзене мой тата.
Можа быць — мая маці
Заменіць мне ката.

Можа быць — хутка вып‘юць
Апошнія сілы.
Можа быць — родна хата
Мне стане магілай.

Можа быць — без хаўтураў
Засыплюць зямлёю.
Нада мной толькі дрэва
Кіўне галіною.

Можа быць — толькі птушкі
Пачнуць там гаворкі,
Будуць часам кружыцца
Над жоўтым пагоркам.

1915 г.