Старонка:Дні вясны (1927).pdf/13

НЯ ШУМІ, БЯРОЗА!

Ня шумі, бяроза, з клёнамі над пуняй,
ня хістайся веткамі наўслонь.
Трымціць, заходзіцца золатаструньне,
лісты люляюць ласку слоў.

Юнак музыка грае на цымбалах…
Люблю я струнны сьмех-рассып.
Калі бяроза лісьце асыпае, —
як шмат у ёй тады красы!

Цымбалы звонкія, званчэй зьвініце
пад ціхай беднасьцю сяліб.
Ліе зарніца колеры ў крыніцу
і золата асеньніх ліп.

Каліна ветлая гарыць ад соку,
цьвітуць расою верасы.
Зьляцеў акорд, зьляцеў акорд высокі…
Люблю я струнны сьмех-рассып.

7-V — 26 г.