ПЕРВЫЙ ИЛИ СТАРЫЙ ЛИТОВСКІЙ СТАТУТЪ.
Права писаные Старого Статуту и даные великому княжству Литовскому Рускому Жомойтскому и иныхъ черезъ наяснейшого Папа Жикгимонта з Божее милости Короля Польского Великого Князя Литовскаго Руского Пруского Жомойцкого и иныхъ многихъ.
Мы Жикгмонтъ з ласки Божее Король Польскій великій Князь Литовскій Рускій Прускій Жомойтскій Мозовецкій и иныхъ, маючи собе достаточное умышлене умысломъ добрымъ и з ласки Нашое Господарское хотячи обдаровати правы Хрестіянскими; всим предатом і княжатомъ и паном хоруговный велможный рыцерой повышоным шляхте и всему поспольству и ихъ подданымъ, а тубылцомъ земли великого Князства нашего Литовского, которого бы колвекъ стадла и стану были; вси их права и привиля Костельные такъ Латинского закону яко Кгреческого теже и светские, которые от памети Королей и великихъ Князей от неколи отца нашего Казимера и брата нашего Александра предковъ нашихъ за живота ихъ на которые бы колвекъ добра и водности мели[1] маютъ подъ которою колвекъ датою Латинскою або Рускою даны волности в собе замыкаючи справедливе слушные справы вышли даны взычены, которые хочемъ такъ мети моцне якобы в тые листы наши слово от слова были выписаны, которые словомъ нашимъ господарскимъ и подъ присягою нашею телесною на светую Евангелию вделаны, держати и ховати слюбили есмо какже обецуемъ и слюбуем во всих их положеных обычаех и артыкулех з ласки сцноты и щедрости нашое умыслили есмо потвердити и вмоцнити, какже потвержаем и вмоцуемъ сказуючи их меты моцны вечными часы.
- ↑ Меты, по Рук. Дзялынскаго изданной в Познани въ 1841 году.
