Сонечны паход (1929)/Балотам сьнежным праз сасоньнік

← Сенажаці і полі асьнежаны

Балотам сьнежным праз сасоньнік Верш Аўтар: Міхась Чарот 1929 год

Камсамолія →

Іншыя публікацыі гэтага твора: Балотам сьнежным праз сасоньнік.

Прапануем да спампаваньня!

БАЛОТАМ СЬНЕЖНЫМ ПРАЗ САСОНЬНІК

Балотам сьнежным праз сасоньнік,
Які смалёвым пахам вабіць,
Прастор балот зімою соннай
Люблю санямі разухабіць.

Люблю, як кусьцік нізкарослы,
Калі з саней назад паглянеш,
Нібы, адкінуўшы ён вёслы,
Плыве на белым акіяне.

Пукаты стог люблю аб‘ехаць,
Сьляды наўкол зрабіць палозьзем,
І сена, выскубнуўшы вехаць,
Люблю раскідаць па дарозе.

Люблю, як санкі мчацца з плачам,
Пісклявы гімн зіме заводзяць,
А конь падкуты чортам скача,
Нібы па шкле, па гладкім лёдзе.

Люблю закутацца кажухам,
Згайсаць ад меж да меж краіну
І крыкнуць гучна завірухам,
Што ў хвалях белых не загіну.

І зноў ляцець… Дуга хай звоніць,
Пакуль конь лейцы не аслабіць…
Прастор балот зімою соннай
Люблю санямі разухабіць…

25 сьнежня, 1922 г.