|
Адны сабе мільёнаў просяць,
другім — нябіты дай гаршчок…
Мікола Заяц, папіросьнік,
у цёмны парк з кіно прышоў.
Спаўняе сон начы загады.
О, царства сноў — цудоўны рай!..
… І вось праходзяць праз прысады
Дуглас Фэрбэнкс і Пірл Уайт.
Джон Голівуд і Аста Нільсэн,
і сьмелы Харт і Гарры Піль, —
да Зайца адусюль зыйшліся,
каб „Пушку“ у яго купіць.
… Дыханьне затаіла заля.
Экран хвалюецца, гарыць.
І цэлы першы рад занялі
зачараваныя сябры.
Чарга… Афішаў барваваньне…
Білетаў ў касе не стае.
„Мікола Заяц на экране!“
Сам Рычард Толмэдж — у фойе…
У мураве густой і роснай
так лёгка тчэцца мараў шоўк…
— Адны сабе мільёнаў просяць,
другім — нябіты дай гаршчок.
| 
Прапануем да спампаваньня!