Родныя вобразы

З пляцоўкі Вікікрыніцы
Jump to navigation Jump to search
Родныя вобразы
Верш
Аўтар: Якуб Колас
1908
Крыніца: http://rv-blr.com/verse/show/7


Вобразы мілыя роднага краю,
      Смутак і радасьць мая!
Што маё сэрца да вас парывае?
      Чым так прыкованы я

К вам, мае ўзгорачкі роднага поля,
      Рэчкі, курганы, лясы,
Поўныя смутку і жальбы нядолі,
      Поўныя сумнай красы?

Толькі я лягу і вочы закрыю,
      Бачу я вас прад сабой.
Ціха праходзіце вы, як жывыя,
      Зьзяючы мілай красой.

Чуецца гоман мне сьпелае нівы,
      Ціхая жальба палёў,
Лесу высокага шум-гул шчасьлівы,
      Песьня магутных дубоў...

Вобразы мілыя, вобразы смутныя,
      Родныя вёскі і люд,
Песьні цягучыя, песьні пакутныя!..
      Бачу і чую вас тут.

(1908)