Пунсовае раньне (1926)/Я. Туміловіч/Ой, я помню

⁂ Ой, я помню
Верш
Аўтар: Янка Туміловіч
1926 год

Прапануем да спампаваньня!

∗
∗ ∗

Ой, я помню…
бруілася рэчка,
Расьпяваў свае песьні гай,
Усё сьціхла таемнасьцю нейкай,
А ў вачох — мітульга.

∗
∗ ∗

А ў вачох —
вясновая ночка,
Распусьціўшы свае валасы,
Пазірала мне весела ў вочы
І напружаны зірк ў ёй застыў.

∗
∗ ∗

І напружаны
рокат сэрца
Пакаціўся да пульхных грудзей,
Толькі лес нейкай зданьню — здаецца
Разам з ветрам у полі гудзе.

∗
∗ ∗

Разам з ветрам
у полі скавыча,
Паклон за паклонам кладзе…
Што-ж рабіць?.. Ўжо юнацкі звычай
Каля рэчкі туляцца ў лазе.

∗
∗ ∗

Каля рэчкі
туляцца звонкай,
Ап‘яняцца чадам вясны,
Толькі вецер — юнак стромкі —
Дзесь шапоча ў лісьці асін.