Песьні-жальбы (1910)/На разстані/Пад шум ветра

Пад шум ветра
Верш
Аўтар: Якуб Колас
1910 год

Іншыя публікацыі гэтага твора: Пад шум ветру (Колас).

Прапануем да спампаваньня!

ПАД ШУМ ВЕТРА.
Праляцела борзда лета,
Наша сьветлая пара.
На дарозе нашай вузкай,
Як раней, стаіць гара…
Скора, скора дуне холад,
Сьнег пасыпе з сініх хмар;
Зноў мароз надыйдзе люты,
І клубком паваліць пар.
Разам з ветрам, халадамі
Думак рой к нам наляціць,
Нудных думак, неспакойных
Сэрцэ беднае сушыць.
Будуць ветры за вугламі
Выць і плакаць і стагнаць,
А у вечэр доўгі, цёмны
Песьні ў коміне сьпеваць.
Бор стары завые нудна,
Зашуміць кругом лаза...
Пад іх шум не раз на сэрцэ
Капне горкая сьлеза.