Песьня (Таўбін, 1928)

Песьня Верш Аўтар: Юлі Таўбін 5 сакавіка 1928 году

На дадзенай старонцы сабраныя ўсе варыянты гэтага твора, якія ёсьць на Вікікрыніцах.

Прапануем да спампаваньня!

Ах, песьня, песьня!..
Рокат струн,
Дрыжэньне сонечных расьніцаў!
Каму, каму твой хісткі струг
У снах лазоравых ня сьніцца?
І я ім сьніў,
І я аб ім
У думках патаемных марыў,
Сьпяваў яму адвечны гімн,
Лавіў цымбальныя удары...
І зноў сьпяваю,
Зноў пяю
У неабдымным дзённым гудзе,
І думку сьціслую сваю
Хачу укласьці ў сэрца людзям...
Таму, — мне хочацца цяпер
Усё абняць,
Ўсяму паверыць,
І зноў чаканіць гартам верш
І з вершам зноў ісьці наперад.
Часамі многа перашкод
Шляхі жыцьцёвыя мілуюць
І вёрткіх думак карагод
Ніяк, бывае, не злаўлю я.
І ўсё-жа шлю
Ўсяму прывет...
Мо' дні мінуць,
Гады адхлынуць
І будзе мне служыць сонэт,
І трыолёты, і тэрціны.

5-ІІІ-1928