Песьня і сіла

З пляцоўкі Вікікрыніцы
Jump to navigation Jump to search
Песьня і сіла
Верш
Аўтар: Янка Купала
Крыніца: http://rv-blr.com/vershu/view/1611



Дайце разгону, прастору
Дрэмлючым песьням і сілам, –
Дрогне запор наймацьнейшы,
Мы ўскалыхнём і магілай.

Продка адвечную думу
Праўнук санлівы пачуе;
Што ўзяць курган нам маніўся,
На кургане адбудуем.

Шлях залаты працярэбім,
Зорна ўзьнясёмся ў высоты
Вышай няпраўды, няславы,
Вышай пакутных балотаў.

Моц сваю сьвету пакажам...
Зьдзіўляцца старцы і дзеці:
Што знача песьня і сіла!
Што знача вельмі хацеці!

(1906-1910)