Першае знаёмства

З пляцоўкі Вікікрыніцы
Jump to navigation Jump to search
Першае знаёмства
Верш
Аўтар: Якуб Колас
Крыніца: http://yakubkolas.ru/category/vershy


Помню, помню тую ночку!
Не забуду я той час.
Пеў салоўка у садочку,
Зор цягнуўся ў небе пас.

Выплыў месяц круглы, поўны,
Падрумянены, як блін.
Церушыўся мрок бязмоўны,
І п’яніў мяне язмін.

І прыйшла ты нечакана,
Сама, строгая, прыйшла!
І са мною аж да рана
Тую ночку правяла.

Загадала першым дзелам
«Рукі ўгору» мне падняць
Ды кішэні аглядзела,
Нават кіцель мусіў зняць.

Распарола мой сяннік ты,
Развярнула мой бярлог,
І лісты мае ад Вікты
Паляцелі за парог.

Праз увесь час з твайго твару
Не знікала строгасць, злосць,
І, сказаўшы мне слоў пару,
Запытала: «Пашпарт ёсць?»

Ты набрала маіх кніжак
Два партфелі і прыпол.
А каб быць знаёмай бліжай,
Напісала пратакол.

(1909)