Творы М. Багдановіча (1927—1928)/I/I/38

← 37. ⁂ Маркотна я чакаю

37. ⁂ Пад ценьню цёмных ліп Верш Аўтар: Максім Багдановіч 1927 год

39. ⁂ Як толькі закрыю я вочы →

Прапануем да спампаваньня!

38.

∗     ∗
∗

Пад ценьню цёмных ліп, схаваўшых нашу пару,
Мы йдзем праплёванай дарожкай па бульвару;
Акуркі, шалуха, паперкі пад нагамі, —
Ды ці прыкмечу іх, калі іду я з Вамі?
Праз дымчаты крышталь празрыста-цёмнай ночы
Ідушчых міма нас людзей зіяюць вочы;
У цемні к нам плывуць рубіны папіросаў,
Ліхтарні блеск адкрыў на ліпе россып росаў…
Ах, колькі ёсьць красы цудоўнай поруч з намі,
Калі глядзець вакол дзіцячымі вачамі!

1911.

Увагі

38. Пад ценьню цёмных ліп. Верш выдаецца з аўтографу (IV, 8,7). Адносна году напісаньня гэтага вершу гл. ўвагу да в. № 36.

У 10-ым радку з двух розначытаньняў поэты: „узглянуць“ і „глядзець“ прынята Літ. Камісіяю — „глядзець“.