Пад родным небам (1922)/З году ў год/Жар-сонца пячэ…

← Летнік

⁂ (Жар-сонца пячэ…) Верш Аўтар: Змітрок Бядуля 1922 год

Навальніца →

Іншыя публікацыі гэтага твора: Ні хмаркі адной. Гарачы дзень вясны…

Прапануем да спампаваньня!

∗     ∗
∗

Жар-сонца пячэ. Гарачы дзень вясны.
Стаіць стромкі бор высокім шчытным тынам.
Жывіца-смала па зморшчынах сасны
Цячэ ручайком —растопленым бруштынам.

Прайшоў тут сякач, пакінуў знак на пні,
Параніў на жарт красуню-баравіну; —
І сок, як алей, плыве аж да зямлі,
На верас імчыць з-пад белі сэрцавіны.

І хмеліць смала, і п’яніць сочны пень,
І радасьць бярэ, што пахне так жывіца.
І хочацца ў даль пайсьці ў вільготны цень,
Душой адпачыць пад бульканьнем крыніцы.

1922 г.