Пад родным небам (1922)/Грымоты й цішы/Юда жэніцца

З пляцоўкі Вікікрыніцы
На сьмерць А. Бурбіса Юда жэніцца
Верш
Аўтар: Змітрок Бядуля
1922 год
Летапісец
Іншыя публікацыі гэтага твора: Юда жэніцца…

Спампаваць тэкст у фармаце EPUB Спампаваць тэкст у фармаце RTF Спампаваць тэкст у фармаце PDF Прапануем да спампаваньня!




ЮДА ЖЭНІЦЦА…

Юда жэніцца на полі.
Маладуха яго — Сьмерць.
Злыдні носяцца ў раздольлі,
Гульню ладзяць, круць і верць.

Гэй, бярыся, зух, у бокі!
Жвавы, рухаўся, народ!
У зварожаныя скокі
Сып, гуляй, шалёны зброд!

Пустамель і прапаведнік
Шышка важная і моль,
Бочак золата, насьледнік
І абшорпаная голь,

Ладзьце карагод пякельны,
У разгойданы віхор
Зацягнеце цягай хмельнай
Плойму цел у соткі гор!

Замест він, у коўш атруту
Лі з зачумленных катлоў!
Сьлёз, крыві, хвароб, пакуты
Не шкадуй, зьмей-душалоў!

Хтосьці ўпрысядкі заскоча,
Дробным крокам прабярэ;
Хтось, як гіцаль, заякоча,
Вышэй голаў задзярэ.

Кінь свой сорам, чалавеча!
Чэсьць сваю не сьцеражы!
Бо разьюшанае веча
Тут ня ведае мяжы.

Чалавечыя законы
Тут ня хочуць панаваць.
Болей мукаў… Болей стогнаў…
Болей жыцьцяў перарваць…

Няма сэрца, няма жалю,
Няма людзкасьці ў душы.
Апусьцілісь Сьмерці шалі.
Зьвер пануе — так пішы.

Хтосьці плача, хтось сьмяецца,
Шле праклёны на прастор.
І трасецца і нясецца
Заварожаны віхор.

Мора полымяў і крыкаў,
Мора сьлёз, крыві, касьцей.
Прэцца, рвецца страх вялікі.
Гэй, у скокі, гэй, хутчэй!

Юда жэніцца на полі.
Маладуха яго — Сьмерць.
Злыдні носяцца ў раздольлі,
Гульню ладзяць, круць і верць.

1915 г.