Описанье и оборона събору руского Берестейского/Предмова
| Описанье и оборона събору руского Берестейского Аўтар: Пётр Скарга 1597 |
СОБОРЪ БЕРЕСТЕЙСКІЙ → |
Прапануем да спампаваньня!
Много речы есть, чытельнику ласкавый, которыми Господь Богъ тыхъ нашыхъ часовъ церковь Свою, одъ еретыковъ утрапеную, потешыть рачылъ. Однакъ две суть особливые: навороченье новыхъ панъствъ до веры християньское а водноченье стародавныхъ християнъ. Абовѣмъ якъ скоро ересь к розъмаитые блюзнерства въ тыхъ нашыхъ краехъ повставати почали, обратилъсе Господь Богъ до поганъ, до Инъдни, до Япону, до Хины, то есть до таковыхъ людей, которые евангелия светого николи не слышели, и оные черезъ слуги Свое прылучывъ до одного стада Своего и одного пастыра, которого Онъ преложылъ надъ овечъками Своими. О чомъ зъ нашою немалою потехою слышалисмо, коли тамътые королеве послы свое зъ великимъ набоженствомъ до Рыму послали, абы послушеньство бискупу Рымъскому, яко на местъцу Христовомъ въ церкви Его седячому, отдали, року тисеча 585 марца дня третего. Зъ другое зась стороны: коли се старали еретыцы ересми своими не только многихъ въ костеле Латинскомъ заразить, але и до Еремияша патриаръхи Царогородского зъ Немецъ писали, обецуючы ему послушеньство, если бы на ихъ ересь зезволить хотель, - не допустилъ того Господь Богъ, абы се тое поветре еретическое аж до Кгрецыи розъшырило. Бо Иеремияшъ патрияръха остро ихъ строѳоваль писаньемъ своимъ зъ ереси ихъ. И потомъ патрыяръха Алексанъдрейскій, взъбужоный отъ Господа Бога, зацное посельство до папы выправилъ, которымъ о зъедноченье съ костеломъ Рымъскимъ усилие просилъ и послушенъство вечное со всими овечками своими обецовалъ столицы Петра светого, року тисеча 595 геньвара дня 5.
Взгленулъ тежъ и на насъ Господь Богъ, въ полночныхъ и озяблыхъ сихъ краяхъ мешкаючыхъ, и розеръванье тое, которое злые люди межы костеломъ грецкимъ и Латинъскимъ зъ великою душъ людъскихъ згубою были учинили, до едности прывести рачылъ. Што се стало року прошлого тисеча 596, въ Берестью, на сыноде Рускомъ, прыстойне собраномъ одъ его милости отца митрополита зъ инъшыми епископы своими. Которая речъ ижь есть вечное памети годна, прыстояло, абы для ведомости посполитое въ друк подана была. Наперьвей ижь есть речь кройникъ и всихь гисторий годна, бо не такъ съ промыслу людъского, як зъ рамене и зъ вшехмоцности Божеи станула, - о што се продъкове нашы не разъ кусили а до скутъку прывести не могли. Што они прагнули - намъ Господь Богъ справить рачылъ. Потомь ижъ противъниковъ милости и зъедноченя нещырость такъ есть велика, же, одъложывшы встыдъ и боязнь Божыю, лъживе справы сыноду того до ушью людскихъ односять, ку огиде и зопсованью унии светое. Абы се тогды тому забечы могло, потреба было певне и кгруньтовне тотъ сынодъ описати. Туть тежъ абы и потомъкове нашы, которые по насъ будуть, ведомость о томъ мели и жебы тежъ ведали, же нашыхъ часовъ люди таковые были, которые и Господа Бога зъ горячостью миловали, и о светую едность и зъгоду пилно се старали.
Мей же то за вдячный упоминокъ, чытелнику милый, а такъ тую книжку чытай, штобысь и самъ себе збудовать и другимъ добрую справу о томъ сыподе дати моглъ. Мейсе добре.