Описанье и оборона събору руского Берестейского/Оборона/9

ОБОРОНА СЪБОРУ БЕРЕСТЕЙСКОГО
Аўтар: Пётр Скарга
1597

Прапануем да спампаваньня!

Што се дѣяло зъ Греки и съ Царогородскимъ панствомъ по соборе Өлерентейскомъ - повѣсть Генадея, патріярхи Царогородского.

Роздѣлъ 9.

Коли се Грекове зъ собору Өлорентейского до дому вернули, Марекъ Еѳеский — людъ простый, и чернь, и попы, неведомые и глупые простаки со побурившы, абы се оному всему, што сполне зъ Духа Светого и за згодою Христовою милостью постановлено было, спротивил[и], — великую перешкоду до выконанья оное светое едности учиниль. Однакъ цесарь стояль моцне, и, иные епископы посполству се устрашить не дали. Ажъ по смерти цесара Яна Палеолокга, коли брать его рожоный, Костентыя Дракгажась названый, остатний цесаръ Царогородский, на паньство наступилъ, зхизьму оную и отщепеньство отновилъ. Послалъ былъ послы до папы Рымъского Миколая Пятого, на словахъ его своихъ и обетницахъ вешаючи, ижъ оную згоду и едность церковную на соборѣ вселеньскомъ одновеную и учиненую потвердить и до скутку привести мелъ. Лечъ папа виделъ хитрость его, и черезъ оные послы (мовить Геннадей въ книгахъ пятыхъ, роздель 14) написалъ листъ, полонъ боязни и страху, въ которомъ явне и съ проклинаньем пророкуєть упадокъ и згубу остатьнюю нещасливыхъ Кгрековъ. Въ томъ листе по иныхъ речахъ, кгды се доведаль, якие потвары и насмевиска Грекове уставичьне и невстыдливе чынили, то дивне поведилъ: «вси народы вырокъ, который есть учиненый, прынели. Грекове не приняли, и нетъ надеи, абы то коли приняли, што ce о згоде и едности постановило, отволоку за отволокою чинять, вымовьки и отповеди на речъ кождую. Нехай не розумеють Грекове, абы Рымский папа такъ былъ безърозумный, и вся Заходнея церьковъ абы не розумела, яко на каждой отволоце кламають. Ведаемъ все велми гораздь, але терьпимъ и зносимъ, гледечы [на] Христа вечного Епископа и Господа, Который оное неплодное енкговое дерево до третего року заховати казалъ, кгды господарь вжо былъ секиру на вытятье наготовалъ». О, великая беда! Року Божего 1451 тотъ листъ написалъ, а року тисеча 453 Царокгродь естъ взятый! «Изажь мовите (мовить до своихъ Кгрековъ), же то неправда?. Не можете (того мовить)! Бо такъ то есть явно, ижъ речъ самая говорыть: тры, дей, лета ждати будемъ, азали се отъ схизмы и отщепеньства наверьнете, и до выроку пристанете, водле Спаса и Бога нашего о дереве фикговымъ росказанью. А если не наверънетесе, вытнутъ васъ, абы земля порожная и непожыточная не была». То (48) есть цудъ надъ цуды великий, ижъ (яко пишетъ въ листе своемъ Миколай папа) Кгрецкий народъ онъ великий и страшливый, и мудрый, славный и моцный, который (всему) свѣту пановалъ, за помъстою Боскою, отъ дикихъ людеи въ неволю пойманый есть. И нижей мовить тотъ же патриярха (въ главѣ 15); «Царокгродъ взели, плакать и волать, и рычать только на то вспомневъши, мушу: (престолы,) олътары помазаные, церкви подоптаные, кровъ розлита, черъницы покгвалъчоные, паньны покажоны, дети высечены, панове выбитые, чернъцы, презвитеры, невесты, малъжонъства розоръваны, посудья светые поламаны, образы пресличные подоптаны и слинами помазаны. О, я нещасливый и бедный! А хто можеть тотъ упадокъ [выпо]ведать! Все Махометь полькнуль! И не толко королевая месть всихъ, але и до ней служачые краины што-день болшие и горшие речы терпять, о которыхъ слышимъ и на нихъ гледимъ. Але для чого то вжды? Мовите: для греховъ нашихъ! А я мовлю: не болеи мы, аникли иньшие народы хрест[и]янские Бога ображаемъ; и овъшемъ болшие у нихъ грехи, чомужъ [ихъ] такъ Панъ Богъ не караеть, яко нещасливый и мизерный нашъ народъ караєть? Беда мне бедному! Мушу плакать, нарекать а пытатьсе о прычине, для которое то терпимъ. Я иньшого не могу найти (бо народъ нашъ въ цноте надъ иные народы последний не есть, и овшемъ лепшыи, который инышие народы въ цноте и въ обычаехъ переходитъ. Иншая тогды не есть причина упадку нашого, одно зхизма и отщепеньство, ижъ се отдалили отъ послушеньства и подданьства Рымское церкви. Тую самую найдую быть прычину згубы нашое. Бо скоро се есмо отделили отъ нее, взяли есмо прокляцство, И то терпимъ, што терпимъ. А однак не жалуемъ, але горшими се стаемъ, и злоречимъ той же церкви». То слова суть Геннадея (патрыярхи Царогородского).