Описанье и оборона събору руского Берестейского/Оборона/6
| ← Роздѣлъ 5 | ОБОРОНА СЪБОРУ БЕРЕСТЕЙСКОГО Аўтар: Пётр Скарга 1597 |
Роздѣлъ 7 → |
Прапануем да спампаваньня!
Яко бискупы во всего христіянства до Риму апелевали; и о праве костелномъ, о томъ написаномъ и въ Рускихъ Правилахъ отцовъ светыхъ найденомъ.
Роздѣлъ 6.И по томъ навызшую моцъ и зверхность папескую надъ иными епископы и патрыярхами познать, ижь до нихъ, яко (першое и) преднейшое столицы Петра светого, зо всего света апеляцый чинено, на ихъ се розсудокъ отзываючи навысший трибунахъ церквей Божыхъ Петра светого въ нихъ вызнаваючи. О чимъ суть права (и каноны) церковные. И соборъ Сардыцынский трохсотъ трыдцати епископовъ такъ въ четверьтомъ каноне мовить: «коли который епископ зложонъ будеть за розсудкомъ тыхъ епископов, которие въ суседъстве мешкають, а отволыватьсе будеть зъ справою своею до Риму, иного епископа на столицу зложоного, по томъ позве, або апеляцый его, ставить не мають, ажъ се его справа розсудъкомъ папы Римъского сконьчить».
О чомъ въ Рускихъ Словеньского езыка Правилахъ отцовъ светыхъ такие писма:
Собору Картагинского (розделъ 138): «презвитера зъ его достойности зложили; онъ потомъ до Целястина, папы Римъского, утекльсе, отъ которого былъ прынятъ, и листь одержалъ, абы ему зась привернено его престолъ».
Антиохейского собору правило четвертое и пятое: «зложоному епископу, або презвитеру, отъ всихъ епископовъ апеляцыя нейдеть, толко до блаженьного папы Рымъского».
Тамъже правило четвертое: «епископа зложоного, на его местьце не ставять иного, если Римский не роскажеть. Тотъ бовемъ розознаеть, або послове его, (если тое зложенье есть слушное, або не)».
Въ соборе Хальцедонскомъ правило девятое: «епископь зъ епископомъ если бы мелъ пру- до чужого епископа (для розъсудку) не могутъ се удавать, бо то Рымскому осудить належить».
Въ светом вселенскомъ соборе Ниценьскомъ второмъ: «зложеный епископъ, если не полюбить суду ихъ, будеть апелевать, тогды маетъ тотъ соборъ судовый, митрополитъ и епископы отсылаючы до Рымъского, тотъ весь судъ выписать, для чого и яко осудили его».