Нёман (Каганец)

Нёман Верш Аўтар: Карусь Каганец 1893

Крыніца: https://knihi.com/Karus_Kahaniec/Nioman.html

Прапануем да спампаваньня!

Ой, Нёман цячэ, Нёман плыве

Ад нас у літоўскія зямліцы.

А хто там найме, хто разбярэ

Шопат і гоман нашай рачыцы.

Ой, многа ж яна

З сабой унясла

Нашага шчасця, славы і гора

З сваёю вадой,

З нашаю слязой

З краю у край аж да сіня мора.

* * *

Ой, шмат жа прайшло,

(Як то было)

Вякоў над нямонскімі вадамі,

Як улез к нам госць,

Моў у горла косць —

Немец загаспадарыў над намі.

Ён нас выбіваў

Ды крыжаваў,—

Думаў саўсім нас са свету звесці.

Ды лясы былі,

І лясы раслі,

Дзе не мог вораг да нас далезці.

Як ні бывала

Ціха стала,

Бо збіралась вялікая сіла

Па нашых лясах

І балатах,

Моў смерць вражжа, нямецка хадзіла.

Ой, страшан быў гром,

Як грохнуў бо ён,

Бо аж светам усім скаланула.

Увесь свет закіпеў,

Свет заравеў...

Да ўсё тое даўно прамінула.

1893 г.