На преславные а старовечные клейноты или гербы, ясневельможного, пана, пана Лва Сапеги (Рымша)

На преславные а старовечные клейноты или гербы, ясневельможного, пана, пана Лва Сапеги, подканцлерего Великого князства Литовского, Слонимского, Мядельского, Марковского и прочих старосты, епиграмма Верш Аўтар: Андрэй Рымша 1588 год

На гербы Льва Сапеги (Рымша)

Прапануем да спампаваньня!

Все можем своим оком, лацно обачити.
Должыню и шырокость, шнуром позначити.
И чоловека можем, познати по твары.
Если в собе не маеть, лишнее привары.
Але где цнота собе обрала оселость,
Там ростроп ест до всего, и мужская смелость.
Которая зацные, завжды домы буди,
I клейноты роздаеть, тыми слынуть люди.
Бо такие николи. з света не изходеть,
Але один по другом, вовеки славу плодеть.
Хочеш же ся присмотреть, гербом праве значным,
зараз можеш познати, иж суть в дому зацным.
Здавна славных Сапегов. тые з предков своих,
заквитывали в цнотах, знать, во лилиях троих.
При которих з оружъем, конный воин стоить,
Знаком того иж ся з них, ни один не боить.
Служить своим сподарем, ку кождой потребе,
Не литуючи скарбов, ни самого себе.
К тому видиш, як в локоть, пострелена рука,
Видиш иж вскрозь, из туга, з пострелного лука,
Такий пострел никого, дома не поткаеть,
одно хто поганьские, полки розрываеть.
В тых же гербех посредку. Есть стрела з крестами,
Двема, а третий блиско, осажоном лунами.
Тые знаком, иж они, болш для хрестиянства,
Клали здоровье свое, не смотречы паньства.
Смотри ж вышей узриш там, над гельмом коруну,
Которая даеть знать иж там бог фортуну,
И цноту з сильным мужством сполне коронуеть,
Чого у них ани моль, ни ржа не попсуеть.
Живете ж Сапегове, вси в многие лета,
Ваша слава слыть будеть, покуль станеть света,
Подавайте ж потомком, што маете з предков,
Ведь же и ваших цных справ ввесь свет полон светков.
Андрей Рымша