На Вялікдзень (Бядуля)

На Вялікдзень Верш Аўтар: Змітрок Бядуля 1918

Прапануем да спампаваньня!

Прышлі анёлы да Айца-Бога,
Казалі Богу: «Чалом, чалом!
Ідзём з далёкай мы пуць-дарогі. —
Мы з Беларусі хвалу нясём.
Хрыстос ўваскрос!

Дзе людзі спалі — усе паўсталі
Жыццё на волі адбудаваць,
У родным краі усе пачалі
Ратаі долю сабе каваць.
Хрыстос ўваскрос!

Да ночы позняй з самага рана
Адбудаванне ідзець без мер.
І хлебаробы пайшлі ў пашану,
Над імі зорка блішчыць цяпер.
Хрыстос ўваскрос!»

Казаў анёлам Гасподзь Магутны:
«Гэй, дайце ў звоны сярод нябёс,
Што Беларускі народ пакутны
Ўваскрос!..»
Хрыстос ўваскрос!