Нашы дні (1937)/Шаснаццатая гадавіна

← Калгасу „Слабада“

Шаснаццатая гадавіна Верш Аўтар: Якуб Колас 1937 год

Каманіну, Молакаву і Слепнёву →

Іншыя публікацыі гэтага твора: Шаснаццатая гадавіна.

Прапануем да спампаваньня!

ШАСНАЦЦАТАЯ ГАДАВІНА

Цвёрды крок жалезнай волі
След пакінуў, як ніколі,
У гэты слаўны год.

Большэвіцкаму напору
Паддаліся скалы, горы
І паўночны лёд.

Гэтай воляй і стыхія
Ў берагі вайшла другія —
Рэкі, вадаспад.

Намаганнем тым геройскім
Па каналу Беламорскім
Пацяклі назад.

У пустэлях Кара-Кума
Гімны пеў маторным шумам
Караван аўто.

То не людзі, а тытаны,
Зразумелі, кім пазваны
Біцца і за што.

І глыбіні стратасферы
Большэвіцкі розум змерыў,
Як ніхто нідзе.

Творчай воляй комуністаў
Шлях праложаны агністы
Вольнай грамадзе.

Днепрабуд, Магнітастроі…
Слава, гонар вам, героі!
Вораг, чуй, зважай!

Шлях шырокі ў свет адкрыты…
Дык красуй і жыві ты,
Наш Совецкі край!

1933 г.