Куток для спорту. Беларускія народныя зімовыя спорты
| Куток для спорту. Беларускія народныя зімовыя спорты. Артыкул Аўтар: Уладзіслаў Казлоўскі 1930 год Крыніца: Часопіс «Шлях моладзі», № 13 (23), сьнежань 1930 г., б. 8-9 |
Прапануем да спампаваньня!
Зіма дае беларускай моладзі больш разрывак і вясёласьці, чымся іншая пара году. Моладзь вясковая гучна аддаецца зімовым спортам. Перадусім кожны любіць пасьлізгацца на лёдзе.
Да сьлізганьня ўжываюць прылады, як канькі, якія пераважна робяцца з дрэва: кавалак палена, абструганага ў трыкутную форму, на сподзе з грубым дротам. Робіцца таксама форма і звычайнай дошчачкі з двума дратамі і зыспаду. Канёк такі накладаецца толькі на адну нагу. Да лоўкіх залічаецца той, хто можа як найдалей праехаць на аднэй назе.
Такая язда вырабляе раўнавагу тулава і ўзмацняе нэрвовую сыстэму.
Апрача сьлізганьня на каньках распаўсюджана ёсьць язда на санках з горкі, язда з горкі на дошках, або на „лядзёшах“, вырубленых на рацэ і прытарнаваных да добрага сяджэньня.
На лёдзе робіцца „каток“ і „крутарга“. Каб зрабіь каток, замаражываюць у саджалцы, або рацэ круглы кол, на каторы насаджываецца кола ад ваза. Да кола прывязываецца доўгая жэрдзь; на канец жэрдзі прымацоўваюцца санкі. Паміж шпіцаў кола ўстаўляюцца калы, прыпомачы каторых некалькі асоб круцяць кола. Ад гэтага санкі, на якіх сядзяць некалькі асоб, з вялікай хуткасьцю апісваюць круг.
Крутарга робіцца гэтак: на замарожаны ў лёдзе кол кладзецца ня грубое бярвяно, так, каб канцы яго не перавешываліся. На кожны канец бярвяна сядае хлапец, а другія ходзячы навокал кала прыводзяць бярвяно ў круговы рух.
Калі і крутаргі вырабляюць адвагу, загартоўвуюць учасьнікаў і даюць ім шмат карысных рухаў і вясёласьці.
Старэйшыя людзі на вёсцы не разумеюць карысьці з кожных разрывак, якім інстынктоўна аддаецца моладзь, нават другі няраз яшчэ сварыцца на сваё дзіця, каторае адчуваючы патрэбу духу, сьпяшыць з кумпанамі на спартовыя гульні.
Ул. Казлоўшчык.