Комсамольскія вершы (1930)/Маладое

← У паход!

Маладое Верш Аўтар: Юрка Лявонны 1930 год

Рэбэ →

Іншыя публікацыі гэтага твора: Заплялася вясна ў карагоды…

Прапануем да спампаваньня!

МАЛАДОЕ

Заплялася вясна ў карагоды
І зімовае цемры — няма!..
Па-над сонным сялом,
над заводамі.
Праляцеў лёгкакрылы Май.

Май хлапчына — „кругом шаснаццаць“ —
Разьвясёлы і надта жвавы!
Ледзь зірне — пачалі расьцьвітацца
Дзяўчаты, вершы і травы.

І зьвіняць серабрыстыя песьні
На спатканьне к ружовым снам…
Гэта ўжо —
не слабое прадвесьне,
А сапраўдная кветка — Вясна!…

Загудзелі лясы перазвонамі
І ў лугох — залатая цьвець.
На карысьць дзеля родных загонаў
Мы прышлі на зямлю гарэць.

І цяпер — асабліва сьвежа нам,
Бо не вісьне на дрэвах туман.
Па-над вёскай, над борам,
над вежамі
Праляцеў лёгкакрылы Май!