Збор твораў (Колас, 1928—1929)/I/2/V/Хмары

← Нявольніцтва

Хмары Верш Аўтар: Якуб Колас 1928 год

Гусі →

Іншыя публікацыі гэтага твора: Хмары (Хмары, хмары, што па небе…).

Прапануем да спампаваньня!

ХМАРЫ

Хмары, хмары, што па небе
Ходзіце гарамі!
Каб меў крыльле, паляцеў-бы
Я на волю з вамі!

Паляцеў-бы ў край той родны,
Дзе так сэрцу міла,
Дзе я вырас, дзе мне радасьць
Моладасьць суліла.

Паляцеў-бы ў луг, дзе Нёман
Бераг точыць, мые,
Дзе гамоняць з ветрам-бурай
Дубы векавыя,

Дзе над Нёманам старая
Пахінулась хата,
Дзе так многа пылу ўлетку,
Дзе пяскоў багата.

Паляцеў-бы да курганаў,
Што стаяць маўкліва,
Да узгоркаў, дзе вясною
Зелянеюць нівы.

Ой, панёсься-б з вамі, хмары,
Я ў той лес цяністы,
Дзе ўздыхалі-б мае грудзі
Хвояў пах смалісты!

Хмары, хмары, што па небе
Ходзіце гарамі!
Чаму я ня маю крыльляў?
Чаму я ня з вамі?

1909 г.