Збор твораў (Колас, 1928—1929)/I/1/II/Дуб

Дуб
Верш
Аўтар: Якуб Колас
1928 год

Іншыя публікацыі гэтага твора: Дуб (Сілачом стаіць…).

Прапануем да спампаваньня!

ДУБ

Сілачом стаіць
Дуб разложысты,
І здалёк відаць
Пышны верх яго.

А ўнізе пад ім
Нёман коціцца,
Срэбрам-стужкаю
Павіваецца.

У нагах трава
Нізка сьцелецца,
А вакол ляжыць
Травяністы луг.

Ўглыб зямлі вайшлі
Карані яго.
Крэпка дуб стаіць,
Не варушыцца!

Так размашыста
Параскіданы
Ва ўсе стораны
Лапы крэпкія.

Комель — слуп-скала,
Дыша сілаю,
А ўгар зірнеш —
Шапка валіцца.

Дуж ты, дуб стары,
Сын вякоў сівых!
Мнга бур ты зьнёс
На вяку сваім!

Налятаў віхор
З навальніцаю,
Ды ня гнуўся ты
Перад бураю!..

Гэй ты, дуб стары,
Вартаўнік лугоў!
Аддае твой шум
Сьпевам-музыкай.

А пра што шуміш
І аб чым пяеш,
Пра то ведаюць
Ветры вольныя,

Што з табой вядуць
Мову сталую
Ў летні добры час
Або восеньню.

Я падслухаю
Гэты шум лістоў,
А з іх гутаркі
Песьня зложыцца.

1910 г.