Збор твораў (Бядуля, 1937)/II/Я пайшоў у сыр-бор

*** Я пайшоў у сыр-бор
Верш
Аўтар: Змітрок Бядуля
1937 год

Іншыя публікацыі гэтага твора: Я пайшоў у сыр-бор…

Прапануем да спампаваньня!

∗ ∗
∗

Я пайшоў у сыр-бор,
Дзе гняздзяцца арлы,
Аб дзяўчыне маёй
Каб не слухаць хвалы,

Каб для сэрца знайсці
Адпачын-супакой
Сярод пушчы нямой,
Сярод гушчы глухой.

Там забуду ўначы,
У лясной цішыні
Аб дзявочай красе,
Аб сардэчным агні.

Я пайшоў у сыр-бор
Гаіць раны душы
Пад мяцеліцай зор,
Пад віхурай цішы.

Наўмысне сыр-бор
Мне аб ёй гаманіў,
Аб ёй мшалы курган
Казкі дзіўныя сніў.

Сярод пушчы нямой,
Сярод пушчы глухой
Дзве хваіны стаяць
І гавораць аб ёй.

Пасадзец, 1912 г.