Завіруха (1929)/Новы год

З пляцоўкі Вікікрыніцы
Апошні крык Новы год
Верш
Аўтар: Міхась Чарот
1929 год
Будзь на варце
Іншыя публікацыі гэтага твора: Новы год (Чарот).

Спампаваць тэкст у фармаце EPUB Спампаваць тэкст у фармаце RTF Спампаваць тэкст у фармаце PDF Прапануем да спампаваньня!




НОВЫ ГОД

Ноч… мароз… мігаюць зоркі…
Не трашчыць на рэчцы лёд,
Сьвету поўныя надворкі, —
Вось прышоў і Новы Год!

Малады, прыгожы, вольны…
Прынёс молат, серп і плуг,
Да работы — дужы, здольны,
Зможа працаваць за двух.

Ён ваяка і работнік:
Ў руках праца загудзе,
Класьці новы мур ахвотнік —
Сьцены к небу давядзе!

І пайшоў галодны, хворы
Стары год ў далёкі сьвет…
Ён прынёс пажараў мора,
Кроўю зьліты яго сьлед…

Лес мінуў, балота, поле…
Азіраецца назад, —
Край, здабыў дзе людзям волю,
Пакідаць ня дужа рад…

Ён крычыць з высокай горкі
Волі быць вартаўніком!..
І мігаюць ў небе зоркі,
Сьнег і холад за вакном…

Прышла раніца… Вось сьвята!
Прабудзіўся ўвесь народ…
Усе ходзяць з хаты ў хату
І вітаюць Новы Год!

1-I 1921 г.