Дні вясны (1927)/Кветкі красы/Маёй песьні ніхто не ачэрніць…

← Мэлёдыя

⁂ (Маёй песьні ніхто не ачэрніць…) Верш Аўтар: Язэп Пушча 1927 год

⁂ (Ня сьніў, ня думаў, не гадаў…) →

Іншыя публікацыі гэтага твора: Маёй песьні ніхто не ачэрніць…

Прапануем да спампаваньня!

∗
∗     ∗

Маёй песьні ніхто не ачэрніць,
і ня выцьвітуць строфы ад рос.
Пазрываў у маленстве я церні,
з жоўтацьвеценю смутак атрос.

Сягоньня-ж аддамся пачуцьцям,
што прынёс ад таемных нізін.
Мая песьня ў палёх заначуе,
там такая зялёная сінь.

з ёю разам і я на узьмежку
слухаць буду дарог перазвон.
Абніму там зарніцаў усьмешку,
абніму і схілюся на дол.

Маёй песьні ніхто не ачэрніць,
і ня выцьвітуць строфы ад рос.
Пазрываў у маленстве я церні,
з жоўтацьвеценю смутак атрос.

12-IV — 26 г.