Дзяўчыне (Колас)

З пляцоўкі Вікікрыніцы
Jump to navigation Jump to search
Дзяўчыне
Верш
Аўтар: Якуб Колас
1912
Крыніца: http://yakubkolas.ru/category/vershy


Не кажы, што злыя людзі
        І што свет паганы:
Сэрца крыўду ўсю забудзе,
        Час загоіць раны.

Тыя раны, што зладзеі
        Сэрцу прычынілі,
Ты думкі і надзеі,
        Што ў табе пабілі.

Ды ці ж варты баламуты,
        Каб твой твар дзявочы
Засцілаўся ценем смуты
        І тускнелі вочы?

Пройдзе ўсё, перажывецца, —
        Вер мне, дарагая!
Будзе час — ускалыхнецца
        Сэрца і ўзыграе.

А ў душы вясна настане,
        Сэрца зноў палюбіць,
Прыдзе доля, ў вочкі гляне,
        Шчыра прыгалубіць.


Не кажы ж, што злыя людзі
        І што свет паганы:
Сэрца смутак перабудзе,
        Час загоіць раны.

(1912)