Гудкі (1930)/Гэрой працы

← Сасна

Гэрой працы Верш Аўтар: Андрэй Александровіч 1930 год

Акцябрыны →

Іншыя публікацыі гэтага твора: Герой працы (Александровіч).

Прапануем да спампаваньня!

ГЭРОЙ ПРАЦЫ

Закалыхалася сірэна ў белых сецях,
узбудзіўшы раніцу зімы…
На лядзянках коўзаюцца дзеці,
як калісьці коўзаліся мы.

Аздобілі бель-сьнежаныя ўзоры
шыбіны застыўшых камяніц…
На фабрыцы
машынным звонкім хорам
кіраваў —
сівенькі машыніст…

А ў тыя дні,
у дні ліхой пакуты,
ён зваў таварышаў,
ён клікаў не маўчаць —
а баставаць!
І сілаю магутнай
рваць путы-ланцугі!
Краінай —
заўладаць!..

Асьнежаны бязьмежныя даліны.
Асьнежаны фабрычных труб квартал.
З шаснаццаці гадоў ён ля машыны,
з шаснаццаці за працай карабоў.

Павевам гордай радасьці — ўрачыстасьць
рабочы клюб прыветліва спаткаў.
— Героя працы — машыніста —
насіла моладзь на руках!..