Вянок (1914)/У зачараваным царстві/Вечэр на захадзе ў попелі тушыць…

⁂ Вечэр на захадзе ў попелі тушыць…
Верш
Аўтар: Максім Багдановіч
1914 год

Іншыя публікацыі гэтага твора: Вечар на захадзе ў попеле тушыць…

Прапануем да спампаваньня!

∗
∗ ∗

Вечэр на захадзе ў попелі тушыць
Кучу чырвоных кавалкоў вугля;
Ціха ўсё; вецер лістка не зварушыць,
Не скалыхнуцца ні траўкай паля;
Цёмные цені даўжэй у лагчыне,
Птушкі прыстаўшай марудней палёт;
Сумна плыве маладзік бледна-сіні
У небі вячэрнім, зялёным, як лёд;
Іскрацца зорак сьняжынкі маркотна,
Збожжэ пакрылося шызай расой…
Кіньмо жэ думкі аб долі гаротнай,
Хоць бы на момэнт спачынем душой!