Вянок (1914)/Думы/Зрэзаюць галіны таполі…

⁂ Зрэзаюць галіны таполі…
Верш
Аўтар: Максім Багдановіч
1914 год

Іншыя публікацыі гэтага твора: Зразаюць галіны таполі адну за адной…

Прапануем да спампаваньня!

* * *

Зрэзаюць галіны таполі адну за адной…
Без скаргі яны на зямлю чэрадою лажацца,
Бо сьмерць іх патрэбна, каб дзерэва новай вясной
Магло бы хутчэй развівацца.
Таварышы-брацьця! Калі наша родзіна-маць,
Змаганьні з нядоляй патраціць апошніе сілы,—
Ці хваце вам духу ў час гэты жыцьцё ёй атдаць,
Без скаргі ляечы ў магілы?!