Васільковы россып (1929)/III/Зноў вясёлыя хаты і песьні

Зноў вясёлыя хаты і песьні
Верш
Аўтар: Сяргей Дарожны
1929 год

Прапануем да спампаваньня!

ЗНОЎ ВЯСЁЛЫЯ ХАТЫ І ПЕСЬНІ

Зноў вясёлыя хаты і песьні,
І бярозавы гай за сялом,
Гэта ўсё, што завецца Палесьсем,
Краем буйных лясоў і балот.

Гэта ўсё, дзе калісь толькі ведзьмы
На ігрышча зьбіраліся ў ноч.
Так было ўжо спрадвеку заведзена
Ў гэтым краі, цямнейшым за ноч.

А цяпер гэты лес парадзеў,
І балоты старыя засохлі,
Новы, звонкі рассыпаўся дзень
На старыя сялянскія сохі.

Ад таго можа ў гэтай вось хаце,
Дзе я ўзрос і на ногі устаў,
Я убачыў, вісіць на плякаце
Смуглы Ленін заместа Хрыста.

А на прызьбе, дзе колісь дзеці,
Вялі гоман вясёлай гульні,
Хлопчык дзеду чытае газэту
Пра вясёлыя нашыя дні.

Ах ты, край мой, пяшчанае поле,
Залацісты палын ля дарог!
Палюбіў я у песьнях да болю
Тваю радасьць і сум на палёх.