Барвенак (1924)/Чары каханьня/Успамінак

Успамінак
Верш
Аўтар: Алесь Гурло
1924 год

Іншыя публікацыі гэтага твора: Успамінак (Гурло).

Прапануем да спампаваньня!

УСХОДЗІЦЬ МЕСЯЦ…

Ўсходзіць месяц чароўны у промені,
Асьвятляючы шэрую даль;
Сталі поўніцца вуліцы гоманам —
Гэта моладасьць ладзіць свой баль…

Песьні льюцца жыцьцёвай крыніцаю
І ўздымаюцца ўвыш — аж да зор,
Пахне жытам, аўсом і пшаніцаю
Зелянеючы шчасьцем прастор.

Дрэмле сад… Ён вятрыскам суцешаны
Ды прыгожаю песьняй дзяўчат,
І п‘яніць мяне пахам цярэмшчына:
Не, каханьне ад сэрца — ня жарт…

Прыгарнісь да мяне з шчырай ласкаю
І ў абоймах сваіх зачаруй…
Каб здалося жыцьцё маё казкаю —
Пацалунак ты мне падаруй.

Гэта ноч так прыгожа вясновая,
Што няўпынна хвалюецца кроў…
Заручыцца з табой песьняй новаю
Мяне кліча каханьне-любоў…