Барвенак (1924)/Чары каханьня/Пакахай

← Зьвіні, зьвіні

Пакахай Верш Аўтар: Алесь Гурло 1924 год

Каваль →

Іншыя публікацыі гэтага твора: Пакахай.

Прапануем да спампаваньня!

ПАКАХАЙ.

Пакахай, калі хочаш і можаш,
Толькі шчыра, вось гэтак, як я,
А інакш — маё сэрца стрывожыш,
Каб душа ныла вечна мая…

Я хачу і магу кахаць шчыра,
Нават верыць магу і хачу,
Ў гэтым порука — звонкая ліра…
Табе сэрца сваё даручу,

Жар душы і імпэт, і жаданьні,
І надзеі, і мары цішы,
Калі толькі ты зможаш каханьнем
Супакоіць парывы душы…

Пакахай, калі хочаш і можаш,
Толькі шчыра, вось гэтак, як я,
А інакш — маё сэрца стрывожыш,
Каб душа ныла вечна мая…