Барвенак (1924)/Хараство прыроды/Да працы

← Над рэчкай

Да працы Верш Аўтар: Алесь Гурло 1924 год

Веснавыя чары →

Іншыя публікацыі гэтага твора: Да працы (Гурло).

Прапануем да спампаваньня!

ДА ПРАЦЫ.

Ластаўкі шчабечуць пад маёй страхою,
Акрыяўшы крыкне верабейка: „жыў“!
А на хаце, крытай гонтаю старою,
Сівы галубочак крыльле разлажыў.

Пупышкі пад сонцам распускаюць дрэвы.
На парозе дзюбу гострыць жар-пявун,
Раніцай ці ўвечар сяло глушыць сьпевам,
А ў хляве рагоча конік, мой пястун!

Адпачыўшы добра пасьля зімы лютай,
Цаліну паедзем заўтра мы араць.
Хоць цяжкая праца мужыка — пакута, —
За яе-ж нам ніва многа можа даць,

Ўстану я раненька, а хто рана ўстане, —
Працы больш уложыць, будзе лепшы спор,
Таму сонца з неба ласкай сваёй гляне
І засушыць пырнік, верас і чабор;

І ральля у пору ўляжацца, упрэе,
І раней за ўсіх я буду засяваць,
Бо, як кажуць людзі — дзе і як пасееш,
Гэтак-жа і з працы будзеш карыстаць…

1922 г.