Васільковы россып (1929)/II/Зіма

← Адзінота

Зіма Верш Аўтар: Сяргей Дарожны 1929 год

⁂ Апусьцеў, паламаўся парог →

Прапануем да спампаваньня!

ЗІМА

Вулкамі веі
Заплакалі зноў.
Сьнежныя зьмеі
Шыпяць за вакном.

Круцяцца, скачуць
І штосьці пяюць, —
Ці на удачу,
Ці згубу маю.

Мне усёроўна
Каторы дзень,
Крывая ці роўная
Месяцу цень.

Сэрцу балюча,
Сябе не шкада…
Сьнежныя кручы
Веюць на дах.

Шчасьця няма,
А ці будзе яно?!
Толькі зіма
Ды сьнягі за вакном.

Толькі завеі
Пасьвістваюць зноў.
Сьнежныя зьмеі
Шыпяць за вакном.