Вярбіна

З пляцоўкі Вікікрыніцы
Jump to navigation Jump to search
Вярбіна
Верш
Аўтар: Якуб Колас
1909
Крыніца: http://yakubkolas.ru/category/vershy


Над вадою адзінютка
Пахілілася вярбіна;
Ные бедная ціхутка.
Ці ж то ёсць у ёй кручына?

Мые Нёман ёй карэнні,
І дурэе вецер з ёю,
А пад нізам чарадою
Ціснуць ногі ёй каменні.

Ёсць кручына немалая,
І шуміць яна так нудна,
Бо ёй доля не спрыяе,
Бо расці ў каменнях трудна…

Так і ты, народ наш бедны,
Як вярбіна, проці волі
Доўга носіш пояс медны,
Гнешся ты, як крыж у полі!

(1909)