Гэта старонка была вычытаная
Мяне па тэй аселіцы
Расстрэліваць вялі.
Вялі п‘яныя ворагі…
Вакол вароньні баль…
Каму-ж
Жыцьцё ня дорага?
Кляшторны,
Стаў на банк!
Бяжы!..
А лес рубінавы
Табе падасьць руку
Пад рогат гільятынавы
Пад сьвісты дзікіх куль.
.........
І так,
Паміж акопамі
Паміж жытоў,
Паміж…
Магіла недакопана
І недакончан крыж.
А рэчка
Так-жа пеніцца
Крыштальнаю вадой
Тут цуда сёньня дзеіцца
Ў краіне маладой.
Тут ня гуляе коньніца
Ня блудзіць цемрашал.
А выйшлі на спаборніцтва:
Машына і… душа.
