УСЕ
Ну?
ВУРАДНІК
Дык як дзела абстаіць?
СОЦКІ
А так, ваша бродзіе: учора пад вечар Трахім і Максім выпівалі…
МАКСІМ
(паказваючы на Трахіма)
Ён болей, ваша бродзіе.
ТРАХІМ
(паказваючы на Максіма)
Каб ён толькі дыхаў! Я з чарачку можа выпіў, а ён усё вытрубіў.
ПАЛАНЕЯ
Каб не Трахім, то мой і ніколі-б ня піў.
ДАМІЦЭЛЯ
Мой-жа бы ніколі і не панюхаў, каб ня гэты зьвядзісьвет, Максім яе!
МАЦЕЙКА
Мой татка і яе (паказвае на КАЦЯРЫНКУ) татка п‘юць гладка — лепей яшчэ, як мы з вамі, ваша бродзіе!
ВУРАДНІК
Маўчыце ўжо вы! Хай адзін гавора!
СОЦКІ
Дык, значыцца, яны выпівалі і выпівалі. Пасьля я йду вуліцай, дык яны й мяне паклікалі.
ВУРАДНІК
І цябе?
СОЦКІ
Але, ваша бродзіе. Я — чалавек падатлівай натуры, ды, у суседзтве жывучы, мусіш з усім гадзіцца. Ну, значыцца, мы…
