Справедливое описанье поступку, и справы сынодовое, и оборона згоды и единости съвершенное

Справедливое описанье поступку, и справы сынодовое, и оборона згоды и единости съвершенное Аўтар: Іпацій Пацей 1597 год

Прапануем да спампаваньня!

Справедливое ѡписанье Поступку, и справы сынодовое, и ѡборона згоды и єдиности съвершенное, котораѧ се стала на сыноде Берестескомъ. В року, 1596, напротивъ явного фальшу, и потвары сыноду якогос змышленого а радше съборища покутного геретыческого в дому прыватъномъ геретыческомъ ѿправованого.

Черезъ ѡдного зъ преложоныхъ духовныхь церкви рускоє. Справедливое ѡписанье поступку, и справы сынодовое, и ѡборона згоды и едности съвершенное, котораѧ се стала на сыноде Берестейскомъ. В року, 1596.

Несподевалемъ се абы таѧ справа зъгоды и милости христиѧнское, котораѧ недавно межы церъковью Рымъскою а Греческою в паньстве Его Королевъское милости Пана нашего милостивого сконъчыласе, залецаньѧ альбо ѡбороны яко потребовала. Поневажъ кождыи христианъскии ч҃лкъ ведаетъ добре яко Исусъ Христосъ збавител нашъ. згоду и милость въ Еванъгелии своеи светои залецити рачылъ, за ѡсобливыи знакъ, почымъ бы его верные познавани быти мели. Не што инъшого толко то, коли межы собою згоду и милость христиѧнъскую заховаю усказалъ, зачимъ и то идетъ хто се в нем кохаетъ и ѡное прагнетъ, тоть з Бога єстъ и истинънымъ ученикомъ Исусъ Хрыстовымъ звати се можетъ. А хто зась згоды и милости христиѧнъское бегаетъ и поретъ єе, таковымъ кождыи сыномъ дъѧвольскимъ и геретикомъ назвати се можетъ. А ижъ не машъ такъ доброе речы на свете которое бы дъѧволъ не радъ переверьнулъ стараючы се яко бы ее людемъ ѡмерзиль, певнеи тую справу згоды и єдности светое, котораѧ се теперъ докончыла межы церковью рымъскою, и греческою, насыноде у Берести черезъ начиньѧ свое люде злостивые иначеи аниж ли се што деѧло, не мнеи долю деи хрыстиѧнъскихъ удавати не занехает, якобы єе закинувъши потварами розъмаитыми людемъ ѡгидилъ, якож вже значне кламъства свое розъсевати почаль, а напродъ яко бы торечъ новая и никгды неслыханаѧ в томъ панъстве почати се мела. Другая жебы тою єдностью права и вольности хрыстиѧнъскиє ламати се мели. Третѧа яко бы се Руси кгвалтъ мелъ деѧти иж ихь до инъшоє веры прымушаютъ безь позволенѧ ихь на то. Четверътаѧ яко бы церемонии вси церъкви восточъное внивечъ ѡберънути се, и на рымскиє звычае претворитисе мели. А на ѡстатокъ усказуючы якиись иньшыи сынодъ и поступки єго бы слушные а за тымъ и декрета якиес сынодовые посланъцовь Патриѧрших по панстве розносечы, людеи христиѧнъскихъ ѿ повинъного послушенъства пастыровъ власныхъ, ѿ господа Бога, и ѿ его Королевъское милости яко зверхънего пана постановеныхъ ѿводечы, а праве всими трвожачы явные кламъства, и потвары за правду удаючы покои посполитыи взрушаючы бунъты розмаитые чынечи безъ встыду и боѧзни Божое перестаютъ. Здало ми се на то за речъ слушную длѧ ведомости певънеишое всимъ тую справу котороемъ добре ведомъ и на штомъ ѡчима своима гледелъ. Длѧ престроги людемъ што накоротшеи на писме выдати, абы люде неведомые правду щирую видечы, кламству большеи не верили, и плетекъ не слухали, а межы себе розъсевати явного ѳальшу не допущали, што єсть из ѡбразою Божею, и ѡславленьемъ не пристоинымъ светобливого а праве ласкавого ѿцевского панованьѧ єго Кор милость, якобы се подъ панованьемъ єго вольностѧмъ христиѧнским кгвалътъ якии мелъ деѧти, прыступуючы тогды до речы. Напередъ што поведаютъ яко бы то якиес новые речы и никгды в томъ паньстве не слыханые почати се мели. Слухаи не вспоминаючи далшихъ и чужоземъскихъ речеи, которые се зъ стороны тое єдности межы рымѧны [!], и кгреки где инъдеи точили, и яко не разъ и Грецыя ѿ тое єдиности ѡдъпадала. А кто хочетъ ѡ томъ ведати ѿсыламь єго до ѡвыхъ книжокъ ѿ кнѧзѧ Петра Скарги ѡ порадку и єдиности церъкви Божое выданых по польску, в року 1590. А хочешъ ли правды ихъ досветчыти доведаешъ се в справахъ сынодовыхъ, але не до ѡныхь правилецъ руских што є моноканономъ [!] зовутъ, бо тамъ того не наидешъ але до метрыкъ и справъ зуполъныхъ сынодовых, и до летописцовъ церьковныхъ, тамъ се правды доведаешъ пры комъ вина зостанет тое згоды, я только то покажу тобе явне што се в томъ панъстве пана нашего а ѿчизне нашои деѧло, абыс ис того ѡбачилъ, новые ли то речы сутъ, и єсли се што противъ праву деетъ. А такъ кгды се доконъчилъ сынод ѳлеренътеискии в року тисеча 439 на которомъ сыноде былъ тежъ и митрополитъ Киевъскии ниѧкии Сидоръ маючы порученье ѿ патриѧръхи Антиѡхеиского Дороѳеѧ, и ѿ столицы его, бо былъ члв҃къ в греческомь писме баръзо учоныи, а не только былъ митрополомъ всеѧ России, але и Сиреискимъ панъства венъкгеръского, яко се то сподпису єго на томъ сыноде значитъ. По доконченью згоды и єдиности на томь сыноде єдучи зе Влохъ до Руси с тымъ покоемъ светымъ, на границы полскои ѿ Збигнева кардынала и бискупа краковъского былъ в сонъчу прынѧтыи, и тамъ же в костеле рымъскомъ по кгрецъку мелъ Литургию светую, ѡ чомъ читаи собе Меховицы новую кроинику, которое зъєдноченье и згоду Русь прынѧвъши, идолъго в неи трываючы якии привилеи собе на вольности церъковные у короля Владыслава, потомъ выправили. А усмыслне єго тутъ вписалъ, абы хто не мовил же то новые речы а тот прывилеи даныи року 1445. слухаи же Владиславъ з ласки Божое Венкгерскии, Дал мацькии, Кроацкии Ромскии, Сиринскии, Склѧвонскии Галицъкии, король, и тежъ земль Краковское Сен домиръское кнѧжа наивышъшое Поморъское Руское панъ и дедичъ.

Ѡзнаимуемъ тымъ нинешнемъ листомъ нашим всимь вобецъ и кождому кому бы то ѡдно ведати належало ижъ то завжды маючы в умысле нашомъ у себе поважати речы небесные и завжды ихъ мети передъ ѡчима нашими. Кгды жъ намь яко людемъ земнымъ ни на што иного не потреба се ѡгледати, ѡдно абы взъгоръжаючи ѡмылности сего света и не даючые уводити тымъ припадком веку сего радьше мели то на памете нашои и ѡ том мыслили, где сиѧниѧ, светлость вечнаѧ всихъ верныхъ ѡбьяснѧетъ и серъца оєдинѧетъ, зроды и ненависти людеи всихъ затлумлѧетъ, ѡ небесных речахъ мыслили а звлаща маючи зверхъность надъ кождымъ врадомъ панъству нашему подъданым абы з насъ ѡборона была кождому повинъность наша до того насъ ведетъ и побуждаетъ, абыхмо иле до того што єсть ку розмноженью и ѡздобы фалы Божое, а звлаща ку зъєдноченю и сполечностю светои умыслъ свои вели, або вемъ в царствии небесномъ черезъ што кольвекъ ѡдно до увельбенѧ пана Бога всемогущого становимо и чинимо ѡбецуемъ собе за плату вечную. Кгды жъ теды за справою ѡсобливою духа светого костелъ всходнии греческии альбо рускии, чого ѿ давъныхъ пожадано было. Абы яко будучи в томъ розоръванью, и росторененью веры светое и светыхъ сакраментов черезъ некоторыхь прычину зъ светымъ костелом рымъскимъ до єдиности и згоды, за жичливостю всихъ католиковь и прыступилъ, теперъ ижъ вже за справою Бога всемогущого из декрету альбо выроку светеишого Євгениѧ папежа нашего четвертого, и инъшыхь светыхъ ѡтець многихъ веры светое єстъ прылучонъ, кгдыжь тотъ светыи и повшехныи костелъ рымьскии вже давно того зедноченьѧ прагнулъ и чекалъ. Про то жъ яко тотъ костелъ въсходьнии, духовъныи тежъ то єстъ иереє вси тое жь веры греческое альбо рускоє в панствах нашыхъ намъ подълеегълыхъ где жъ кольвекъ будучые, которые бы єще были в таковомъ розоръванью и в нерѧде, прыверънути ихъ хотечи до ѳалы Бога всемогущого, и ласки збавителѧ нашего имъ зычачы, абыхмо черезъ нихъ яко верхънихъ милостниковъ веры светое въ упокою уставичномъ, и в добромъ здоровью за ихъ молитвами были заховани. На честь и на фалу Бога всемогущого, которыи насъ дорогою кровью своею ѿкупилъ. В симъ церъквамъ ихъ єпископомъ альбо владыкамъ иереем учытелемъ и инъшимъ ѡсобамъ духовънымъ то ежъ релии греческое альбо руское, тые вси права и вольности звычае вси позволили єсмо на вечные часы дати, якожъ и нинешнимъ листомъ нашимъ позволѧемъ, которыхъ ужываютъ вси костелы кролевъства нашего польского, и венъкгеръского, такъ яко аръцыбискупи бискупи иерее и иншые ѡсобы костельные звычаевъ костела рымъского уживаютъ и зъ своихъ вольностеи веселѧтъ се.

Надъто хочемъ то мети якож и нинешнемъ листом нашимъ росказуемъ, абы ѿ того часу жоденъ з дыкгнитаровъ старост врадников земских и инших подданных наших и кого ж бы колвекь стану або кондыцыи были, а звлаща в королевъстве нашомь полскомъ, такъ тежъ в землѧхъ Рускои и Подольскои и иншых до нихъ належачыхъ з владности преречоныхъ єпископовъ альбо владыкь иереевъ тогожъ закону греческого альбо руского, ани тежъ зъ судовъ иереев альбо викариевъ ихъ не выстикали жаднымъ способомъ звычаевъ ихъ до того часу в землѧхъ нашых заховалыхъ имъ не перекажаючы, надъто абы тые єпископове альбо владыкове, и инъшое духовенъство вышеи помененое веры греческое альбо руское, были хутливъшиє и пильниишиє ку ѳале Пана Бога всемогущого ѡнымъ и ихъ костеломъ всимъ в панъствехъ нашыхъ где кольвекъ бъдучихъ, вси села и ѡселости якие кольвекъ и якими кольвекъ имены альбо прозвищами были бы названи, которые здавна до тыхъ костеловъ, и на потомъ належали бы, и черезъ якие жъ кольвекъ ѡсобы, и в которыхъ кольвекъ землѧхъ и поветехъ нашихъ наданы сутъ зо всими ихъ правы з ласки нашее прыворочаем на часы вечные, на што длѧ лепшого сведецства печать наша нинешнему листови завешона, деѧло се то и данъ єстъ в будзыню в пѧтницу передъ неделею середопостною, наиблизъшого року Божего тисеча 443, пры бытности велебного в Пане Кры стусе ѿца и пана Симона з Розкганова бискупа Акгреского. Вельможныхъ урожоныхъ и зацныхъ и шлѧхетных Вавриньца з Гедревары кролевства Венъкгеръского, Грыцъка с поморанъ земли Подолское, воеводах матку столонча нашыхъ королевствъ далмацъкого кроацъкого, и всего склавонъского Пане Миколаю Шарълеискимъ с Тиборова Владиславичу Доброкгосце з Остророкга Каменецъким кашталѧнехъ ѳлюриѧне с Пачанова подъстолимъ краковскимъ, и Николаю з Борисовичъ кухмистру, нашимъ и инъшихъ веръныхъ нашихъ светкахь, данъ черезъ руки вельможныхъ, Яна с Конецьполѧ канъцлера корунъного, и Петра с Тыкочына подъкаъцлерего веръныхъ нашых верне нам милыхъ.

Ѡтожь маешъ прывилеи Владиславовъ на волности церъковъные, которого потомъ Алексанъдеръ король Польскии и великии кнѧзь Литовскии, на соиме вальномъ Петрыковъскомъ потвердилъ в середу, передъ неделею середопостною, року Божого тисеча 504, черезъ руки великого канъцлера, Яна Лаского зъ старого привильѧ преписъ наидешъ въ книгахъ кгродскихъ лвовъскихъ, вписаныи року тисеча 537, в пѧтницу по светомъ Андрею Апостоле, а потомъ недавно король Стефан тыє ѡба два прывильѧ въ свои привилеи уписавшы потвердилъ ихъ. Смотрыжъ тутъ, хрестиѧнскии брате єсли правду мовѧть противницы, якобы то новыє речы зачати се мели ѡдь теперешнихъ владыкъ рускихъ, ѡтодалеи анижъ ѡдь полътораста детъ таѧ светаѧ згода сконьчиласѧ, и в томъ паньстве черезъ немалыи часъ трывала, бо се то значить ясне которого року сынодъ Ѳлореньтыискии былъ.

А которого зась потверженье короля, Владыславово и Алексанъдрово уросло, а мало бы се и посельства до Риму ѡ тои справе в дому ихъ милости панов Сапеговь не показали, с которыхь дому єздили до папежа, а ижъ недъбалостью самое жь Руси и духовъныхъ ихъ занехало се то было якос, ижъ сами не хотели се почувати въ своихъ вольностѧхъ.

Пытамъ же тѧ винъни ли сие которые вольностеи церъковныхъ, и того за чимъ тую вольность ѡдержали, поновлѧютъ, певне имъ того жадное право зламати не можетъ, кгды жъ королеве ихъ милость, вси привилѧ, такь прыватныє яко и посполитыє, попрыктнути намъ рачыли, не єстъ то теды ламанье права и вольности яко некоторые то удаютъ, але речы давные упривильеваные до скутку своего прыводѧт се, што се было занехало начас недъбальствомъ другихъ, которые єсли бы се упоромь иныхъ ламати мели, ѡ всихъ быхъмо правахъ нашыхъ звонтъпити мусели. Але если же правъ своихъ свецъкихъ моцно стережете, не ламълите жъ и церкви Божои правъ єє давнеишихъ, и не называ ите того новиною, што такъ давно яко бачыте сталосѧ. Еще тежъ мовѧтъ якобы то без ведомости иньшихъ статисе мело, не розумеючыее ведомости до того была потреба, поневажъ пастыры церкви Божоє на которыхъ то наболеи належало, яко митрополитъ и владыкове вси, которыє прывильѧ в рукахъ своихъ мели, добре ѡ томъ ведали и зезволѧли сѧ на то. Хотѧ жъ два из нихъ Премыскии и Лвовьскии стали сѧ апостатами, але нижеи доидешъ ихъ следомъ, а ѡ другихъ молодъшихъ єсли бы которые тому противни быти хотели, пытаю, хто кимъ владаєть, чы попы владыками, чы ли владыкове попами, которым порадокъ церкви Божои естъ поручоныи. Бо не до поповъ ани до светъскихъ мовитъ Духъ светыи, внемаите убо собе и всему стаду, въ немъ же васъ Духъ светыи постави єпископы, пасти церковъ Господа и Бога єя же снабде кровию своєю. А єсли же идеть ѡ людеи

стану свецкого, тыє поготову меньшеи до того мають, але за пастырми яко ѡъвцы ити, и ѡныхъ слухати винни суть. Бо лепеи ведаеть пастыръ што ѡвъцы пожиточьно, але жебы сѧ и тымъ людеи не ѡбражали, а серца свое успокоили, покажу тоже и тые и сиє ведали. А снать некоторыє чельнеишиє панове тоє релиие греческоє сами того причиною и початькомъ были. И пастыромъ своимъ дороги подали, ѡ чомъ ѡзнаимити сѧ всимъ здало сѧ за реч слушную, хотѧ жъ вемъ же ми ѡдинь з духовных рускихъ преложеныи за то не подѧкуєтъ же таемъницу выдамъ, але волю в тои мере правде догажать аниж ли ѡсобе, которыи албо длѧ прыѧзни, албо длѧ погрозокъ не ѿкрываєтсѧ с тымъ передъ людми, што мъ теды слышалъ и ѡчима своими виделъ, повемъ, недавно виделъ єсми у єго милости ѿца владыки Володымеръского, листъ кнѧжати єго милости пана воєводы Києвъского, с подъписомъ власноє руки єго милости и с печатью, в которомъ его милость передъ трема годы пишучи до ѿца владыки, ѡзнаимуеть ижъ мелъ розмову с посломъ папезскимъ Писовиномъ ѡ згоде и єдности, а ижъ з нимъ не могъ ничого постановить хотечи до влоскихъ краинь сам єхати, а тамї понедалеку папежа будучы ѡ тои згоде тракьтовати, єсли бы ихъ яко духовныхъ на то позволеньє было, и далеи на концу того листу заклинаєть помъстою Божею ѿца владыку, же бы сѧ ѡ то старали. А на томъ сыноде которыи на ѡнь часъ былъ у Берестьи початокъ якии добрыи уделати могли, видель ємъ тежъ и иньшихъ листовъ немало у него жъ, с которыхъ сѧ значить иж не поѡдинъкроть ѿ ѿца владыки Володымерского єго милость былъ до тоє згоды напоминань, коли сѧ знову противнымъ єи быть показовалъ.

Ну жь ѡныє книжки друкованые руские которых написъ Униѧ выданые, и єго милости пану воеводе ново҃городъскому прыписаные, ѿ которогос преложеного церъкви греческое, в которыхъ тую єдиность залецаеть, и до згоды напоминаетъ, и за ли неявнымъ ѡбьвещеньемъ тое справы были, не въспоминамъ того яко се скоро таѧ справа зачела, заразомъ ѡтецъ владыка Володымерьскии и въ Володымеру и в Берестью завжды на казанѧхъ своихь ѡ неи ѡзнаимоваль, и посполитымъ молитвамь залецал, а снать ѿ него мало не всимъ ку ведомости прышло ѡ чомъ ми самъ давалъ справу ижь заразомъ черезъ неякого Красовского братству Львовскому ѡ томъ ѡзнаимилъ, єсли же тежъ и инъшые въ своихъ пара ѳиѧхъ тоежъ чынили, тогды прожне мають на неведомость нарекати в тои справе, хиба єсли ѡ такую ведомость гра идеть же се ихь не пытали ѡ то, и не взели ѿ нихъ позволеньѧ, того не вѣмъ, є сли же у Руси таковыи ѡбычаи, же бы сѧ мели преложоныє у светскихъ радить и пытать, яко церъковью Божею рѧдить, и чого ѡвечокъ своихъ научати маютъ. Але в костеле рымъскомъ не пытаютъ се ѡ томъ єпископове своихъ ѡвечокъ, толко што постановѧтъ, то кажутъ своимъ ѡвечкамъ деръжати. А ѡни тежъ яко ѡвцы слухают пастыреи своихъ, и ведаючи же имъ рѧдъ в церкви Божои порученъ, повеленое творѧть, а в справы ихъ не втручаютъ сѧ. Такъже бы и Руси быти мело, абы кождыи своего поволаньѧ смотрелъ, а в справы собе неналежныє не втручалъ сѧ. Але снать и в томъ некоторыхъ предънеишыхъ Пановъ чтили, а яко мамъ ведомость ижь так рокъ в Люблине ѡ трыбунале ѡтецъ владыка Володымерскии мелъ розмову с кнѧжатемь єго милостью паномъ воеводою Киевъскимъ, пры некоторыхъ зацныхъ людехъ, и тамъ же єго милости всю тую якос и коли сѧ зачела листы и списы инъшыхъ владыковъ явне показовалъ, и снать упадаючы со слезами до ногъ єго просилъ, абы яко предънеишыи тое релии в тыхъ панъствахъ будучы поважностью стану своего до того допомогъ, и ѡ тую справу згоду старалъ сѧ хотечи вси на раде єго милости полегати, а безъ єго воли ничого далеи не чынити чымъ єго милость снать уконтентовавшы сѧ на томъ пересталъ, абы сѧ владыкове ѡ сынодъ у єго Королевьское милости старали, ѡбецуючи на томъ сыноде речы вси вести до згоды, за тымъ владыкове єхавьши до Кракова, а давьшы ѡ всемъ достаточную справу у єго Королевское милости сынодъ певныи зъєднали, которыи только было универсал ми оголосить, але длѧ большое певности жебы тотъ сынодъ не на разоръванье ѿ некоторыхь просилъ се, его Королевъскаѧ милость послати рачил сенаторовъ двохъ до єго милости пана воеводы Киевъского ѡзнаимуючы єму ѡ певномъ синоде быле бы се хотель цалымъ серъцемъ, до тое светое єдиности прихилити, и другимъ быти поводомъ, але потомъ Торунъскии зъездъ и иньструкциѧ на тотъ зьездъ посланаѧ, котораѧ всимъ ведома єстъ тоть сынодь розорвала, а ну тому самые универъсалы друкованые ѡстрозъские показовали то, длѧ чого того сыноду потребовано, певьне не длѧ тверженьѧ, але длѧ розорьваньѧ тыхь речеи, якое жь дали ведомости было потреба над тую ѡ котроое сь слышаль. Про то хто се пана Бога боить, а правду милуеть, мусить признатъ же на пастырахь церькви Руское ничого не сходило, досыт иле сѧ имь годило ѡ томь давали знат.

За такими теды початками изали прыстало длѧ упору людского справы такъ светое и церкви Божои потребное ѿбечы и всимъ ѡ землю ударити, а єго Королевъскои милости и всимь намъ тую надею, которую єсмо завжды ѡ Руси мели, змысли праве выразити, жебыхмо вже николи по нихъ тое згоды не сподевалисе, єго Королевскои милости тежь яко Пану Зверхънему ведаючи добре ѡ такихъ умыслахъ скрытыхъ людскихъ которые се не до згоды стегали, постерегаючы покою в панстве своемъ не годило се сынодовъ таковыхъ позволѧтъ, которые бы замешанье большое, аниж ли згоду и покои прынесли, бо то явне чынили на писме выдавали хотечи бурыть тую згоду. А што большаѧ и по параѳиѧхь некоторых епископовь потаемне розъсылали, бунътуючы поповъ противъ власнымъ ихъ пастыромь, и списуючи ихъ на реестръ. А про то жъ панове попове не маете се ѡ што гневати, же сѧ ваши пастырове васъ некоторыхъ, яко буньтовъниковъ ѡ то не радили, але повинъности своеи досыть чынечи, а стараючы се ѡ лепъшыи порадокъ в церквахъ своихъ и ѡ чуинеишого пастыра надь собою и надь вами, ѡдновлѧючы ѡную светую згоду продъковъ своихъ залечьлую. Згодивьши се сами межи собою не безъ ведомости иньшихъ своихъ немалоє личъбы духовеньству которыє тоє згоды прагънули.

З волею и ведомостью єго Королевъскои милости выправили двухъ с посродъку себе до Рыму, которыє будучи тамъ в Рыме, а ѿдавьши послушенство светеишому ѿцови Клеменьтови папе ѡсмому, яко церемонии и вси ѡбрѧдьки церкви своее ѡбваровали, листы потверженьѧ папеского ѡдеръжали, с которыхъ ясне познаєшъ єсть ли што своєго потералъ, абы потомъ нихто не смелъ мовити, же се все поламало, албо некоторые бредѧтъ, же то толко до часу позволено, а почекавши тоть же албо другии папежъ то все ѿменит. Не веръ тому, геретыческие то сутъ потвары, бо єсли бы чого моцъне дерьжати не мелъ воли, певне бы и не позволѧлъ того зразу.

Яко коѳтомъ, алексаньдреискимъ которые ижь малыє єреси, и бредни во своеи церькви мели мусели в Рыме черезъ цалыи рокъ мешъкати, покол ажъ все переполеровавши, и блуды некоторыє ихъ выкинувъшы, толко самыи бранть веры католическоє науку имъ подали, тожъ их додому ѿпустили. Але вамъ не потреба того было, ѡдно некоторыхъ арьтыкуловъ доброго розуменьѧ, ихъ поправившы што єдиности заважало, а ѡстатокъ все ѡд мала до велика яко службу Божую вси литурьгии, сакрамента и церемонии, ѡбрадъки, и звычає церкви восточноє по преданию светых ѡтецъ греческихъ, якос те доселе мели вцале и неѿменне вамъ заховано и вечне утверьжено, а што разъ позволеено, будьте того певни, же се николи ѿ жадного з нихъ ламати не будеть, а хотѧ бысте вы сами што хотели ѡсѧгнуть, ведаите же вамъ того не допустѧть. А ижъ бысъ в том ниякоє вонтьпливости не мелъ, ѡ томъ тутъ выписалъ с привильѧ папезского власныє слова потеврьженьѧ єго, на которыхъ все залежить. Бо ижъ предословьє того прывильѧ немалоє и списка светого зобраноє, и велми ѡзъдобноє не бавечы тебе тымь кгды жъ то можетъ все потомъ быти в друку. Томъ толко тутъ выписалъ, на чомъ увесъ кгрунтъ залежытъ которыє слова з латиньского на рускоє преложоныє такъ сѧ в собе маєть.

Клименътеи слуга слугъ Божыхъ, и далей.

Абы теды певное и вечное соедецъство было и ку тому вечнаѧ паметка ѡ прыверъненью и зъедночонью народу росииского до костела рымъского тымъ нашымъ вечънымь постановеньемъ велебную братию, Михаила аръхиепископа митрополита, и инъшые епископы руские вышеименованые, которые декретомъ своимъ се зволили, и на листех до нась посланыхъ подъписали се такъ прытомных яко и не ѡбецъныхъ посполу зовсимъ ихь духовенъствомъ, и людъми народу руского, которые до панства и деръжавы дочасное намильшого сына нашего, Жикгимонъта польского, и швецъкого Королѧ, належатъ ку чти и фале светое и неразделимое Троицы Ѿца и Сына и Духа светого ку розмноженю и подьвышъшенью веры христиѧньское на лоно церкви католическое, и до единости светаго рымъского костела, яко члоньки наши ѡ Христе прыимуєм съєдинѧемъ, прылучаемъ, споѧемь, и втелѧемъ. А длѧ большого сведецьства любви нашое против имь вси светые ѡбрадьки и церемонии, которыхъ руские єпископове и духовеньство ихъ, водлугъ постановеньѧ светыхь ѡтецъ греческихь въ служъбе Божои, и въ ѿправованью пресветое жерътвы, литуръгии, и иныхъ сакраменътовъ и ѡбыходовъ светыхъ ужывали, только бы правде и науце веры католическое не были противни и сполечности з рымъскою церъковью не псовали, тымъ же єпископомь рускимъ з ласкавости Апостольское дозволѧемъ. А тому не маетъ перекажать ниякое постановенье апостольское якое жъ кольвекъ противное, вси про то єдиномысленъно, и єдинодушно благословимъ Бога небесного и Ѿца милосеръдиѧ, ѡнъ же самъ творыть чудеса ѿ вѣку которыи серъца сыковъские до ѿца наверънулъ, ѡвцы Хрыстовы до ѡвъчаръни прывелъ, члонъки до головы паки моцно прылучилъ благословеныи Бог, которыи завжды промышлѧетъ мысли покою, и хочетъ всимь спасти сѧ, и в разумъ истинъныи прыити, благословени сутъ братиѧ наша, Михаило Аръхиєпископъ митрополитъ, и инъшие єпископы єго рускиє, которые ушью своих не затулили на голосъ Господень, але єму у двереи серца стоѧщему и толькущему ѡтворили, єго же благодатию которыи даетъ хотение и соверъшение за добрую волю ихъ нехаи дастъ Богъ ѡбѳитость даровь небесныхь, и да сохранѧетъ и утверъжаеть их в томъ предъ се взѧтью за всимъ духовенъствомъ и верънымь народомъ абы пребывали въ любве, и в послушенъстве светое рымское церъкви матере своее, абы познали и уставичне исповедали величество Бозского милосеръдиѧ ку собе, и жебы ходили по пути Господнемъ заховываючы єдиность Духа въ соузе покою з нами яко сынове нашы възлюбленые, которыхь прынѧли єсмо ѡ Господи з особъливою радостью нашою, тако Христосъ Господь по благодати своеи неизмерънои прыкладомъ Руси, нехаи всихъ кгрековъ, которые ѿ старожытное веры заблудили, и тыхъ всихъ которые ихъ в блуде наследують взрушивъшы, которые в томъ съєдинению мели бы были передъ Русью предковать, кгды жъ такъ давно двоѧкимъ незмерне тѧжким ярмомъ душевнымъ и телеснимъ стиснени сутъ, которыхъ утрапеньѧ вдень и вночи ѡплакиваемъ, абы и ѡни наследовали єдиности и покою, и ѿкинувъшы вси блуды темности, абы се закохали в правде и въ светлости, и абы се навернули до насъ, которыхъ желаємъ прынѧти до серца нашого во любве Исусъ Хрыста, абы во всихъ былъ прославлень Богъ и чтець Господа нашего Исусъ Христа, и абы была єдина ѡвъчарьнѧ и єдин пастыръ, амин.

Хочемъ тежь абы тыхъ листовъ теперешних переписы и выдрукованьѧ рукою писара преднеишого, альбо капитульного подъписаны, и печатью ѡсобы якое достоенъства церъковного запечатаны тую жъ веру мели у суду, и ѡпрочъ суду, якобы тежъ власные ѡрыиналы, были поданы и указаны.

А то вже на самомъ коньцу такъ замыкаєть.

Нехаи же вже жадному чловекови болшеи не годит се псовати, албо смелостью упорною противити се сему листови нашому, прынѧтю, соєдиненю, прылученью, прыстаню, и втеленью, и тому што есмо дозволили, допустили и ласкаве простили. А єсли бы се хто смелъ того важить, нехаи ведаєть ижъ таковыи упадеть въ гневъ Божыи и благословенныхъ Петра и Павла. Данъ в Рыме у светого Петра, року ѿ воплощеньѧ Господнего тисеча 595.

Ѡтожъ маєшъ потверженьє всихъ церемонии и ѡбрадковъ своихъ брате русине, чого ж надто болшеи хочешъ, изали єще будешъ смети иначе и то удавати аниж ли тутъ бачышъ.

Але вемъ што єще речете, ѿступили пастыреи своихъ ѿцовъ и добродеевъ своихъ, которые ихъ крещеньємъ светымъ просветили, и на веру хрестиѧньскую с поганьства навернули, и до познанѧ правды Божое прывели. Знаємъ то але не тот которыи почнеть, але которыи доконаєть, благословенныи бываєтъ.

А хочешъ ли сѧ тому пилне прысмотрети, не ѡни ѡдъступили ѡдь патрыѧрховъ вашихъ, але патрыѧрхове ѡд нихъ, бо ихъ праве ѿступили повинности своее занехали, порѧдку межы вами недогледали, поведьте жъ ми што есте за корысть с тыхъ патрыѧрховъ своихъ теперешнихъ мели, што за науку што за прыклады добрыє, в шокъ есте того сами досветьчили, коли тутъ прыежьджали чымъ васъ утешили што за паметку по собе зоставили. Єсли толко тую же хлопов простыхъ, шевцов и делниковъ, кожемѧковъ, надъ єпископовь преложыли, а увесь порадокъ церковныи ѿ духовоньства ѡдьнѧвшы, светскимъ людѧмъ в моцъ продали, изали то невеликое уближеньє врадовъ єпископъскихъ, што написали у своихъ прывильѧхъ братству новому наданыхъ, єсли бы кого попъ братьскии свезалъ, албо вклѧтву вложилъ, и самъ епископъ не маєть моцы его разрешати. Азали то не ѧвноє уближеньє враду єпископъскому, не въспоминаю листовъ иньшихъ которыє до тыхъ панствъ посылали листы на листы выдаючи, а толко межы вами колотьню чынечы, невиньне на заѡчъноє ѡскарженьє безъ суда безъ права з урадовъ скидаючы, а толко по волъну и по молоко до васъ прыежьджаючы, а жебы наука и порадокъ в церкви Божои былъ, на мне и ѡ то не дбаючы, ѡ тожъ не меите за зле своимъ єпископомъ, ижъ ѡни видечы великии непорадокъ, а што далеи то болшое знищеньє всего в тамъ тыхъ восточныхъ краѧхъ за скараньємъ Божымъ а не волею поганьскою, волели удатисѧ ѡдь члоньковъ зветралыхъ, до головы ѡдь меншихъ до старшихъ, ѿ уделныхь до пастыра вселенского, ѿ неволников, [ахъ не стеитыжъ мало ли таковыхъ] до слуги и наместьника Хрыстового, з нераду и великоє простоты, до порадку и науки всего света с потоку высхлого, до источъника неисьчерпанного ѿ нового до стародавного, которому речено паси агньца моѧ, ѿ чотырохъ єдиного и до такового, которыи и тымъ чотыромъ росказовалъ. А што болшаѧ которому первеи сего во ѡсобе митрополита своєго Сидора вси єсте послушенъство ѿдали были, подь которого справою будучи за ласкою Божьею, а што ведати можете и тымъ беднымъ грекомъ братьи своеи пред отечами быти и дорогу указати, и до всего доброго имъ помочы, быле бы сами скинувшы пыху зъ серца, пана Бога ѡ то просити не занехали, але вместо того жебы се до тоє светоє згоды сами мели, за которую бы и с тоє поганьскоє неволи выити могли, тутъ єще никоторыє з нихъ здрады подь хрестиѧнствомъ чынеть, и шпекгами явными поганьству бывають. Доведаити се ѡдно што се и тутъ и въ волошахъ ѿ нихъ деєть.

Далеи в самои речы поступуючы вернувшы се за тымъ ѡныє дваи владыкове вашы з Рыму которыє были ѿ єго Королевскои милости длѧ сконченьѧ тоє справы послани прыєхали до Варшавы праве предъ самымъ сконченьємъ сеиму, где з великою вдѧчностью ѡдь нашыхъ прынѧты, а потомъ ѡдь некоторыхъ ихъ милости пановъ сенаторовъ духовныхъ и свецкихъ до его Королевъскои милости, на палацъ проважени в неделю, 5 дн҃ѧ маѧ скоро єго Королевскаѧ млсть с костела вышолъ, на палацу мало не предъ всими сенаторми духовными и свецкими, и пры собранью множества людеи зацныхъ становъ коронныхъ, єго Королевскую милость пана своєго витали, и все што се в Рыме справило явне реферовали, листы ѿ папежа ѿдали, єго Королевская милост теж ѡных з великою вдѧчностью прынѧлъ, пану Богу за доконьченьє тое светое справы дѧковалъ, ѡнымъ и всему духовеньству церкви греческое, ласкавымъ паномъ и ѡбороньцою быти ѡѳеровалъ се, кождыи хто тамъ на ѡнь часъ былъ, и словомъ єго кролевскаѧ млсть которыє самъ хвилю добрую мовилъ, познати моглъ великую хуть паньскую, ку тои справе и ку ѡсобамъ ихъ, а в томъ тутъ не безь прычины вписаньє мое вложилъ же снать некоторые иначеи то удавали и картелюше якиесъ розсевали, поведаючы якобы єго Королевскаѧ милость тыє влады прыѡмъкемъ витати мели, а потомъ до людеи не смели се показовать. Заправда єсли жетакъ ясную справу котораѧ на видоку всихъ становъ немалъ коронныхъ была, а смеле люде невъстыдливыє иначеи удавати. Не дивую се тому же иньшыє речы ѡ которыхъ не вси люде ведати могуть, умеють перевернути чымъ бы тую светую єдиность людемъ ѡмерзили, а потомъ за прозбою тыхь же владыковъ, длѧ ведомости всимъ што в Рыме справили, абы се то ѡзнаимило єго Королевскаѧ милость, универсалы своє господарскиє выдати розказати рачылъ, позволѧючы митрополитови Києвъскому, яко старъшому церквеи рускихъ в паньстве своємъ сынодъ на которыи бы се часъ єму наслушнеи здало, зложити назначаючы местьце сынодови Берестеискому, на которыи сынодъ волность даючы кождому, аведже толко релии греческоє, и рымъское людемъ прибыти, и тымъ справамъ прыслухати се, вылучаючы ѿ того сыноду людеи розноє веры и посоторонныхъ, яко неналежныхъ до того сыноду, затымъ теж и митрополитъ чынечы досытъ, воли и росказаню єго Королевскои милости и повинности своеи, порозумевши се з некоторыми владыками, которыхъ могъ наближеи досегнути, тотъ сынодъ головъныи на день шостыи месеца ѡкътебра водлугъ старого каленъдара зложилъ, и листы своими добре предь часомь ѡзнаимилъ. На которыи сынодъ митрополитъ самъ прыєхаль. Зъехали се тежъ до него и владыковъ пѧть, то єстъ Володымерскии, Луцкии, Полоцкии, Пинскии, и Хольмскии, и иньшихъ архиманьдритовъ, игуменовъ, и презвитереи немало, прыєхали тежъ на тотъ сынодъ зъ стороны рымскоє, и по слове светеишого ѿца папежа в Бозе велебныє и ѡсвецоныє панове, єго милость кнѧзь Деметреи Соликовскии арцыбискупъ Лвовскии, єго млсть кнѧзь Бернать Матиевскии бискупъ Луцкии, и єго милость кнѧзъ Станиславъ Кгомолиньскии бискуп Холмъскии. Были тежъ, на тот сынодъ зослани ѿ єго Королевскои милости послами, которыє на томъ сыноде местьце господарскоє заседати покою и порадъку догледати мели. Ихъ млсть ясне вельможныє панове, панъ Миколаи Радивил кнѧжа на Ѡлыце и Несвижу воєвода Троцкии, пан Левъ Сапега канцлеръ Великого кнѧзъства Литовъского, а єго милость панъ Демитреи Халецкии подскарьбии Великого кнѧзъства Литовского староста Берестеискии, которыє порозумевши се зъ ихъ милостью паны сенаторъми духовными и з митрополитомъ, и з владыками варуючы покои посполитыи артыкулы списали, местьце схажькамъ сынодовымъ звыклоє где и первеи сыноды бывали в церкви мурованои соборнои светого Николы, назначывши тые артыкулы ѡбъволати и до вратъ церковныхъ прыбыти велели, абы всим ведомо было.

Прыехала теж и сторона противънаѧ з немалы людомь, єго кнѧжатскаѧ милость, панъ воевода Киевъскии, з велю зацъных пановъ и шлѧхты маючы пры собе двохъ владыковъ апостатовъ ѡныхъ, Премысского, и Львовъского, которые се были первеи до тое єдности и згоды списали. А пры томъ и иного духовенъства немалаѧ личба. А межы паны шлѧхтою мало не болшаѧ часть розных геретиков, арыѧновъ, новокръщенцовъ такъ же и колька чужоземцовъ, грековъ постооронъныхъ, которые вси не розделѧючы се, але спольне з геретиками у господе кнѧжати єго милости каменицы в дому прыватномъ, гдѣ соборища геретические звыкли бывати, и теперъ бывають, тамъ собе ѡсобливе ѿ митрополита и владыковъ иньшихъ и ѿ пановъ и пословъ папескихъ, и єго Королевскоє милости безь воли и звиръхности господаръскоє, иньшоє коло учынили, и тамъ схажали се, учинивши того своєго соборыща маршалкомъ альбо правителемъ явного арыѧнина, и тамъ же людеи до себе скупили и ззывали, а иньших и поневоли тегнули. Потомъ коли день назначоныи сынодови ѡкътебра 6, прышолъ по старому ѡтецъ митрополитъ з владыками поменеными петьма, и з духовеньствомъ своимъ которых при собе мели зъшедшы се на местьце назначоное до церкви соборноє рано тамъ же ѡжидали ѡныхъ двох владыковъ и духовенства иньшого, сподеваючы се ихь ижъ се на местьце звыклоє где и перед тымъ сыноды ѿправовати звыкли ставить мели. Але кгды се ихъ дочекати не могли, и ѡ вшемъ ведаючы же собе якиєсь иньшиє прыватныє схажки з геретыками учинили, тамъ же вже водлугъ ѡписаного порадку яко се звыкли сыноды зачинати.

Напервеи честь а ѳалу Пану Богу ѿдавши молитвы звыклыє ѿправившы местьца свое в церкви засели, и въступъ тому сынодови учынили. И тую першую справу того дн҃ѧ писарови прысѧглому ѡсобе духовнои записати дали, ѿложывши дальшиє справы до завьтриѧ.

Назавътреи ихъ милость панове сенаторове, послове єго Королевское милости, которые были длѧ постереганѧ покою и порадку на тотъ сынодъ зослани, видечы ижъ сторона противнаѧ инъшое собе местце прыватное и незвыклое ѡбравшы и зъ геретиками схажки якиес чынили, а до цереви съборное первого днѧ на початку того сыноду, до митрополита яко до старшого своего и до иншое братьи не прышли, єхавъшы ихъ милость сами до нихъ, упоминали ихь именемь зверхъностью господаръскою, абы тымъ прыватнымь схажъкамь покои дали, абы се ѿ геретыковь ѿлучили, а на местце звыклое до митрополита, яко до старъшого своего, которыи имь тотъ сынодь зложилъ такъже и до инъшое брати своеє большое громады єпископовь шли, а тамъ спольне ѡ справахь церъкви Божоє радили, и намавлѧли. Але сторона противнаѧ жадною мерою не хотела се ѿ геретиков ѿлучыти, а потомъ того жъ дн҃ѧ семого ѡкътебра, кгды митрополитъ з владыками в дворе церковномъ, на ихъ милость пановъ сенаторовъ пословъ єго Королевъскои милости поколь бы се до церкви зышли ѡжидали. Прышолъ до двора Никиѳоръ Туръ нареченыи арьхимандрить Печерскии с килкомъ ѡсобъ певныхъ р ариѧновъ знаємыхъ, которыє принесли до митрополита, и до владыковъ, картелюшъ якисъ безъименныи, и нетъ ведома ѿ кого посланыи которымъ картелюшом, зганивши напервеи сынодъ и не прызнаваючы єго быти сынодомъ, а потомъ заразомъ митрополита и владыковъ з урѧду ихъ складають, и послушенство выповедають не ведати хто ѿ кого. Митрополитъ пыталъ, ѿ кого бы с такимъ поселствомъ прышли абы ѡсобъ меновали, и тотъ карьтелюшъ длѧ лепшого зрозуменьѧ єму ѡдали абы ведаль на што маєтъ ѿказу чинити, а в томъ кгды сѧ ѡ то долго спречали, дати або не дати ѡныи карьтелюшъ. Ихъ милость панове сенаторове, послове єго Королевъскои милости, прышли до двора церъковного, хотечы ити до церквы а доведавши се ѡ тыхъ посланьцохъ шли до митрополита, и заставши тамъ толко геретыковъ ѡных, бо Никиѳоръ Туръ ѡбачивши ихъ милость пановъ радныхъ, заразомъ з оным картелюшомъ проч утекъ, пытали ѡныхъ посланьцовъ ѿ кого бы с такимъ поселъсьвомъ до митрополита прышли абы ѡсобъ меновали указуючы имъ, же сѧ то противъ зверьхности господаръскоє деєть, бо не митрополитови ани владыкамъ, але самому єго Королевъскоє милости, в особахъ ихъ послушенъство выповедають, кгды жъ митрополитъ и владыкове не сами зъ себе тоє преложенъство в церкви Божои, и надъ людми хрестиѧнъскими ѡвечъками своими мають. Але ѿ Пана Бога наперьвеи а потом ѿ єго Королевъскоє милости пана своєго зверъхнего помазаньца Божого, а чого имъ хто не далъ того у нихъ брати не можеть. И хто кольвекъ таковыи єстъ што се с тымъ ѡзываєть, самому господару противѧт сѧ, а ку тому такъ крыѡмъ комъ без ведомости ихъ пословъ господарьскихъ, яко тых которые тут ѡсобу панскую на собе носѧт, и длѧ порѧдку на тотъ сынодъ ѿ господара посланыи ничого бы сѧ дѣѧти не мело, и такь же ѡныє посланъцы, не давши ниякоє справы ѿ кого бы послани были прочъ ѡдышъли, ѡднакъ ихъ млсть панове сенаторве жадноє ѡказыи не ѡпущали, упоминаючи сторону противную яко сами черезъ себе, такъ и черезъ людеи зацныхъ пословъ своихъ, жебы давши покои тымъ покутънымъ схажькамъ, а геретыкомъ звлаща которыє до того сыноду намнеи не належатъ, жебы ѿ нихъ ѿ нихъ ѿступивши посполу з митрополитомъ заседали, а ѡсобъливе ѡныхъ двухъ владыкъ сами ихъ милость упоминали, жебы сѧ з геретиками не товаришили але до своєго старъшого и до братьи шли.

Але кгды вже ниѧкаѧ надеѧ ѡ ихъ упаметанью не зостала, митрополить и увесь сынодъ видечи ихъ упоръ явныи, дн҃ѧ девѧтого ѡктебра у суботу, зъшедъшы сѧ зь ихъ милостью паны сенаторми с послами ѿца светеишого, такъ же и господаръскими и з ыными владыками и духовенством такъ своимъ яко и рымъского костела пры згромаженью великомъ инъшыхъ людеи христиѧньских до церъкви собороное, а ведъ же ѡбославьшы вперед сторону противную, и давъши имъ ѡ томъ знати єсли бы до тое справы прибыти не хотели, пущаючы имъ на волю.

Тамъ же в церъкви всѣ панове духовъныє, такь рымъские, яко и греческие, убравъши сѧ въ свое єпископъские ѡдежы, и засевъшы порѧдъ не на своихъ местъцахь, длѧ замкненьѧ тое светое єдности и згоды, напервеи митрополита при немъ владыковъ три, Полоцькии, Холмъскии, и Пиньскии, чинечы досытъ ѡбетницы своеи, которую были учинили черезъ послы свое, владыку Володымеръского, и Луцъкого, такъже и по присеженью ихь, которое ѡтъдали в Риме, ѿцеви светому на послушеньство, а теперъ то все сами стверъжаючы вечъными часы, признавъшы светеишого ѿца папежа римъского за власного своего пастыра и старъшого, и листы свое кождыи з нихъ по ѡсобну подъ печатъми и с подъписомъ рукъ своих до которыхь и инъшие духовные ихъ, аръхиманъ дрытове, игуменове подьписали сѧ, на знакъ вечистого послушенъства своего, ихъ милостѧмъ паномъ сенаторомъ духовънымъ посломъ папежскимъ до рукъ ѿдали, и тую згоду и єдиность светую с костеломь римьскимъ потвердили, а потом з великою радостью и триумъѳомь духовънымъ у звоны звонечы, честь а фалу Пану Богу сполъне ѿдавъшы поцалованье братеръское яко єдиного Бога люде, и єдиное матери церъкви светое сынове, а братьѧ сполъные и учинивьши и сконъчившы тые церемониє в церъкви рускои, заразомъ всѣ с про цесиею по паре дерьжачы се за руки, яко єдиного пастыра ѡвъцы и єдиное ѡвчаръни баранкове, а кнѧз аръцыбискупъ з митрополитомь, а бискупове з владыками шли до костєла рымъского до ѳиры, а тамъ по латине, тебе Бога хвалимь, з музыкою и зъ ѡрьганы ѡдьпевшы и сполъными молитвами чест а хвалу Пану Богу ѡддавши тую справу, тот день сконьчили. Назавътреє в неделю ѡктебра десѧтого дн҃ѧ, в иихъ милость сенаторове духовъные и свецкие послове папаежъские и господаръскиє, зъшедъшы сѧ до церъкви соборное на ѳалу Божию, и тамъ литургии светое, которую ѡдъправовалъ ѡтецъ владыка Володымерьскии, з духовеньствомъ своимъ слухали, пры которои литоръгии, проповедалъ слово Божые кнѧзь Петръ Скарьга казнодеѧ его Королевьское милости залецаючы тую светую єдиность и згоду, и показуючы быти ѡднакие, и тые жъ всѣ церемоние церкви греческое, яко и рымского костела, и упоминаючи Русь, абы пры церомониѧх своихъ моцно стоѧли, а ѡ жаднои ѡдмене не мыслили, и упевънѧючы всѣхъ в томъ, ижъ хотѧ бы и хотели што ѿменить, тогды за тою єдиностью самъ папежъ и костелъ рымьскии не допустѧтъ им того, кгдыж сутъ светобливыє и ѡтъ светыхъ ѡтецъ греческихъ, которыхъ и рымлѧне въ великои повазе маютъ постановленые. А коли вже было по казаню передъ ѡглашенъною молитвою, митрополитъ ув убере своемъ вступилъ былъ на амбонь, хотечи владыковъ ѡныхь двохъ Премыского, и Львовъского, и инъшыхъ духовныхь помочников ихъ клѧтве предати, изь урѧдовъ духовъныхъ зложити, за непослушенъство, и за взгарду, которую против зверхъности духовънои, и господаръскои учинили, а наболеи ижъ з геретыками ѡбьцовали, але ихъ милость панове сенаторове яко духовныє, такъ и свецъкиє, послове папежъские и господаръскиє, повставши з местецъ своихъ, а прыступивши до митрополита и до владыкъ, жадали абы сѧ єще с тымъ позадерьжали, а того дн҃ѧ светого, такъ смутъныхъ и жалосныхъ речеи, до потешъныхъ и весолыхъ не мешали, а до завътрешьнего дн҃ѧ понеделъка тую справу ѿложили, азали бы сѧ тымъ часомъ сторона противнаа ѡбачыла. Што митрополитъ радъ учынилъ, и до завътреѧ тую справу ѿложилъ, за тымъ служьбы Божиѧ порадъкомъ своимъ доконьчила сѧ. Але сторона противнаѧ стоѧчы при своємъ упоре, и не бывши на томъ сыноде в церъкви, ани в митрополита с тыи ижъ геретыками с которыми заседали, и с такою жъ зкграєю яко были на сынодъ зъєхали сѧ, з воискомъ з гаидуками зросточоными с пропоръцами, з Берестьѧ тогожъ дн҃ѧ в неделю, утаивьшы всѣ справы свои прочъ ѿехали.

А назавътрии в понеделокъ ѡкътебра 11 дн҃ѧ. Митрополитъ и владыкове, зышедъшы сѧ зь ихъ милостью паны сенаторьми духовными и свецькими до церькви соборноє, при собранью немало духавеньства, рымъского и греческо и иньшихъ хрестиѧнъскихъ людеи. А заседъши на мєстьцахъ своихъ зъ ихъ милостью кнѧземъ аръцыбыскупомъ и бискупами, яко спольныє братьѧ нарадившы сѧ добре. Потомъ митрополитъ вступивши на амъбонъ с церемониєю звыклою противниковъ ѡныхъ, Михаила Копыстенского владыку Премысского, а Гедиѡна Балоба на владыку Лвовъского, наместьника своєго, и иньшыхъ аръхиманьдритовъ, игуменовъ, попов, єдиномысленниковъ ихъ, узнавшы быти противниками зверъхности ѿ Бога поставленноє такъ духовноє, яко и свецъкоє, и ѡсудивши ихъ быти геретиками и ѿщепеньцами. А то с тыхъ прычинъ, ижъ будучы позвани на сынодъ и ѡбъвещени, такъ универъсаломъ господаръскимъ, яко и листы митропольими, не хотели сѧ на местьце звыклоє до церъкви соборъноє где перьвеи соборы ѿправовали сѧ ставити. Але ѡбравши собе инъшоє местьце домъ геретицъкии посполу з геретиками, з новокрещеньцы и зъ ариѧнами соборовали домомъ Божимъ згоръдили, а што большаѧ маючы ту жъ подь бокомъ церъквеи не мало ѡпустивъши церъкви в соборыщу геретическомъ при єретикахь литоргею светую, противъ яснымъ правиломъ ѿправовати смєли, и зъ геретиками молилисѧ. А будучи не разъ упоминани ѿ пословъ господаръскихъ, и ѿ самого митрополита, не хотели сѧ геретиковъ ѡдьлучити, с тыхъ прычинъ клѧтве ихъ предавъши, из урѧдовъ ихъ духовныхъ декретомъ сынодовымъ поскидалъ. Тымъ теды жалоснымъ акътомъ тотъ сынодъ свои скончили на вечъную паметъку, и на пострахъ въсимъ незбожнымъ людѧмъ, а на честь и хвалу Бога въ Троицы єдиного, и ку потесе верънымъ хрестиѧномъ, которыє тоє згоды давно прагънули.

А тутъ вже пущаю на розъсудокъ кождому бачному человекови, наконець и неприѧтелеви тое светое згоды, быле бы сѧ Бога боѧлъ, а правду знати хотелъ, розъсуди котораѧ тутъ сторона винънеишаѧ, єсли сяѧ, котораѧ собе въ всемъ скромне, статечне, и несквапливе поступовали, на сынодъ яко на справы светые, и побожные, безъ зкграи, безъ гаидуковъ, безъ арматы, толко сами прыехали на местце сынодови звыклое становили сѧ, митрополита яко старьшого церквеи своихъ, ѿ которого тотъ сынодъ былъ зложонъ при собе мели, большаѧ часть епископовь, которые на сынодахъ перъшые местца маютъ, зверхъность господара помазанъца Божого, за которого волею и росказаньемь и тотъ сынодъ былъ зложоныи, послове єго сенаторове зацные, на которыхъ з росказаньѧ господаръского, покои и порадокъ увесь того сыноду залежалъ, поневажъ на собе ѡбоѧ, которымь тотъ сынодь по половицы, и єднако належалъ, бо ѡдна безъ другое не могла єго ѡтъправовати, меистце где заседали светое, домъ Божыи сынодами перъшими и списами самыхъ же, митрополита и єпископовъ ѿ колька летъ на такиє справы утверъженоє, где вже не разъ сыноды бывали, люди засъ волные до жадноє ѡсобы не прывѧзаныє православныє, хрестиѧне щирыє, а не ѡблудныє католикове, єдиноє веры и єдиного исповеданьѧ, Бога в Троицы єдиного братьѧ, тихиє спокоиныє згоды и милости хрестиѧнъскоє, а нечого большеи прагнучы ѿ всѧкоѧ єреси, и ѿ геретыковъ прожныє, которыхъ залецати не потреба самыє поступъки, статечъностъ, покора, и укладъностъ ихъ в тои справе залецила, бо ани противъ Богу, ани противъ милости братеръскоє ничого не выкрочили, але в згоде в милости все ѿправовали, противъникомъ тежъ своимъ всѧкое людъскости показывати, просити упоминати до згоды вести не занехали, и ниякоє ѡказыи ку позысканью ихъ прыстоиноє не ѡпустили, ѿ геретиковъ ихъ ѿводили сами з ними заседати прагнули, ни с кимъ тежъ кгвалътомъ не ѡбходили сѧ никого не бунтовали, ани до списовъ таємъныхъ и приватьныхъ не прыводили, але все ясне ѿворысте справовали, з молитъвами и хвалою Божьєю водлугъ каноновъ сынодовыхъ зачавъши, з молитъвами и благодарениємъ Божьимъ сконъчыли, спокоине прыєхали, и спокойне сѧ тежъ и розъєхали.

Посмотримъ же противноє стороны. Напервеи прыєханьє ихъ не яко до рады, але яко до зъвады, з воискомъ, з гаидуками, с татаръми, с чужоземьцами, з геретыками. А тожъ на першом вступе маньдатови господаръскому в лобъ дали, волю ѡписаную и заграниченьє господаръское проступили. Другаѧ мало вынѧвши ихъ милости пановъ хрестиѧнъскихъ и духовныхъ, мало не большаѧ часть геретиковъ, арыѧновъ, новокрещеньцовъ межи ними было, нужъ што тыхъ чужозмъцовь, постороньныхъ межи которыми ѡдин подозреныи, которого самъ єго Королевъскаѧ милость, в листахъ своихъ зрадьцою своимъ и всего хрестиѧнъства быти меновалъ, и ѡбьцованьѧ с ним людемъ почтивымъ мети заказалъ. Не въспоминамъ выклѧтых банитов, Божимъ и свецким правом ѿ сполечьности людъскои вылучоныхъ. Поидєм же до поступковъ и справъ ихъ, власне яко посполите мовѧтъ, прыєхавъши до места и за печъ.

Такъ же и ѡни учинили, зъєхавши сѧ до Берестьѧ на тотъ сынодъ, вместо церъкви соборноє где сѧ перъвеи сыноды ѿправовали, влезли в домъ геретическии где соборыща геретическиє уставичне бываютъ. Церъковью Божею возъгорьдили, на молитвы звыклыє ѿ которыхъ сѧ сыноды починають не ставили, старъшимъ своимъ митрополитомъ за которого листы и сынодъ былъ назначонъ згрумѣчали, а правидо девѧтоє сыноду Анътиѡхииского безъ митрополита власного, не повелеваєтъ єпископомъ ничого чынити, пословъ єго Королевъскоє милости пана своєго, и поселством господаръскимъ которыє ихъ милость на тотъ сынодъ мели за ни за што поличили, братьею своею паны рымлѧны которымъ тотъ сынодъ такъ яко и имъ належалъ взгоръдили, але вместо дому Божьєго, домъ геретическии, вмесмто послов господаръскихъ, чернецъ зрадьца господаръскии, вместо католиковъ, геретыкове, вместо митрополита, правитель сыноду арыѧнинь явъныи. Слухаи же далшого поступъку ихъ, што с тои шопы геретыческоє уросло. Не съшедъшысѧ зъ стороною другою не позволившы, не выслухавшы справы, не доведавшы добраѧ ли злаѧ, без жалобы, безъ ѿпору, безъ права, безъ суда, безъ судеи зуполныхъ, заѡчьне покутне, несоборъне декретъ якиись учинили. Митрополита и владыковъ пѧти старшихъ складаючы з столицы ихъ, и послушенъство имъ выповедали, и якось карътою закинули, и с тымъ кого бы послати не могли сѧ на хрестиѧнъ правьдивыхъ собрати, але ѡдного Тура аръхиманьдрита Печеръского заклѧтого и выволанца, а при немъ килька геретиковъ ариѧновъ послали с карьтою пустою безъименною неподъписаною, и неть ведома ѿ кого выданою, а потомъ и с тою не дочекавшы ѿказу поутекали.

Смотри жъ ѡдно яко тоєю карьтою хто жъ кольвекъ єе писалъ сами сѧ поразили. Бо наперъвеи пишеть в неи, не признаваючи того сыноду за сынодъ и задаючы килька причинъ, же не єстъ сынодомъ, а потомъ заразъ послушенъство выповедають, и зъ урѧдовь складають. Если жъ тот сынодъ у нихъ не єстъ сынодомъ пытаю, яеою властю то чинѧть, ижъ послушенъства выламуютъ сѧ и урѧды ѿбирають, тшо все сынодовои справе належытъ, бо того безъ сыноду учынить не могли, власне якобы тежъ хто хотелъ безъ соиму конъстытуцыи творити, але правъду мовите же тотъ сынодъ, вамъ не єстъ сынодомъ. Бо не на местьцу звыкломъ соборовомъ, але в божьницы геретическои до котороє чловекови хрестиѧнъскому и входити не годило сѧ, а єсли же речете же в Берестьи где сынодъ зложоныи, якобы сте тежъ до Варшавы на сеим прыєхавшы у буръмистра за печью соимовали, а пана зверъхнего и сенатъ єго на палацу покинули. Такъ же сте и вы власне учинили, зверьхность господаръскую которую на собе послове єго великиє носили. И длѧ порѧдъку догледаньѧ на тотъ сынодъ прыехали тыми єсте згоръдили, въ лепшои вазе у васъ были послы месцъкиє, анижъ ли господаръскиє, безъ вожа, безъ пастыра, безъ помазаньца Божого пана своєго, безъ другоє стороны, то єcтъ пановъ рымлѧнъ, а єсли же речете же з ними справы никакое мети не хочете, дать же было покои и геретикомъ, але вместо христиѧнъ геретикове, вместо митрополита, Калугеръ зрадца хрестиѧнскии, на местце дому Божого, соборище геретическое, тамъ же сте што єстъ нагоршого и литуръгию светую ѿправовали, и взъгордивъши всими церквами иле ихь было у Берестьи, коротко мовечы во всемъ противь Богу, противъ зверхъности господаръскои, противъ старьшому пастырови своему, противь милости братьскои, противъ всѣмъ правиломъ светыхъ богоносныхъ ѡтецъ своихь греческихъ, противъ явнои справедливости, и праву посполитому духовъному и свецкому выкрочили єсте, по геретическу а не по католицъку, якосте зачали такъ же и коньчили єсте, где ани головы ани старъшого не знаютъ, але всѣ рѧдѧть, всѣ хотѧтъ быти єпископами и пастырьми, не знат коє ѡвца а коє пастыръ. А про то жъ тоє соборище ваше слушне игрищемъ якимсь, анижъ ли сынодомъ назвати сѧ можеть.

А што сѧ дотычетъ послушонъства котороє выповедаете, ино давно єсте ѡ тое послушенство мало дъбали. А звлаща вы владыкове два, ѡдин з вась ѡ бурды, што мелъ з братствомъ Львовъскимъ, якъ же былъ послушенъ митрополиту, а наконецъ и самого Патриѧрхи, а другии ѡ владычицу, коли єго клѧли, а вы геретикове, давно єсте послушенъства не только церъковного, але и Божого ѿступили. Про то не мели єсте чого выповедати. А што сѧ дотычетъ поповъ, трудно вамъ в параѳеи чужои рѧдити, хиба по геретическу кгвалътомъ, єсли бы кождыи своему попови хотелъ быти єпископомъ, але и попомь ражу ѡгледати сѧ, абы с поповъ не были хлопи, на што се давно насадило, того вы небожата только не бачите. А што сѧ дотычетъ ѿреченьѧ альбо изверженьѧ и судовь вашыхъ, ѡбачъте жъ сѧ што за владза ваша, што за зверхъность ваша и противъ кому. Если ѡсобы духовъные, пытаю хто таковыи, Никиѳоръ чернецъ, которыи сѧ быти поведаетъ посломъ Патрыѧръшимъ, а кому жъ тутъ лепеи верити, єстли же чужоземъцови збегови не знаемому, чи ли єго Королевскои милости, помазанъцови Божому а пану своему, которыи єго зрадъцою своимъ и всего хрестиѧнъства быть поведает и кождого хто бы з нимъ ѡбьцовалъ, за такового мети хочеть. Чистаѧ учтивость и зърадъцою господаръскимъ ѡбъцовати, а єсли же естъ посланьцомъ Патрыѧршимъ, перьвеи же было того што єму задано справити сѧ, и сподеи зреньѧ вывести се, а потомъ ѡзнаимивъшы ѡ листехъ патриѧръшыхъ, єсли бы якиє были, позволеньє ѿ єго Корилевъскои милости взѧти, тожъ ихъ митрополитови и владыкамъ указати, а з ними ѡ томъ ѡчевисте мовити, чимъ лепшии Калугеръ зрадца и збегъ. Надъ ѡдного зацъного и великого Патрыѧрху Еремеѧ, которыи самъ ѡсобою своєю, прыєхавшы до панъства єго Королевъскои милости, пана нашого яко человекь бачныи ведаючы же тутъ безь позволеньѧ господаръского не могъ бы владзы своєи ростегати, которую давно потерѧлъ, ижъ ѿ єго Королевъскоє милости позволеньѧ взѧвши тожь тутъ справовалъ, бо єсли бы мелъ владзу звыклую не потреба єму было таковыхъ листовъ, а сесъ не маючы ниякоє власти ани слушъного за собою сведецъства єсли же єстъ тымъ чимъ сѧ менуєтъ, и ѡвшемъ будучы человекомъ подоизренымъ, наганенымъ, мелъ бы владзу надъ митрополитомъ и владыками ростегать покутне, заѡчъне.

А єсли речешъ не самъ былъ, але дваи владыкове тутошныє з нимъ, и иныхъ духовныхъ немалаѧ личъба.

Поведъте жъ ми панове владыкове, где сте сѧ того дочитали, жебы сте мели старьшого своєго митрополита, и другихъ владыковъ месцемъ старъшихъ надъ себе, а звлаща не маючы на то порученьѧ, судити, але што мовлю судить, безъ суду, безъ права, безъ позву складати, а єсли єсте што мели, а чому жъ есте до нихъ с тымъ не показали сѧ, а хотѧ бы што и было, а засте запаметали правила десѧтого, альбо дванадъцатого собору Каръѳагеньского третего, же и единого єпископа ѡбъвиненого, дванадъцать єпискповъ, презвитеровъ шесть, а дияконовь тако судити мають, єсли бы сѧ вси єпископи ѡное митрополи҃ зъехати не могли, абы два молодшихъ шести мели бы єсте поконать, а ку тому старьшого своего митрополита подъ которого властию завжды были єсте, а што болшоє ѡдинъ з васъ будучы наместьникомъ або владыкою дворьнымъ митропольимъ власне яко слуга пана своего, а ку тому сами того всего будучы началъниками, а засте не вы наперъвеи патрыѧрьховъ своихъ зрекли сѧ, ѡдинъ з васъ у Берестью ѿ пети лет на сыноде перъвомъ, а другии передъ двема годы в Сокалью, ѡ чом мало не все место ведало. А єсли жъ сиє што до готовоє ѿ васъ зачатоє речы пристали, винными бы мели быти, яео далеко болшеи вы чиноначалъниками будучы. Але и же сте сѧ стали апостатами нетъ ведома кому к воли, ино не дивъ же сте на ѡбе стороне слова не здеръжали, а тымъ слушнеи карани быти маєте. А єсли же поведаєте же ѡ томъ не ведаєте, чому же сте сѧ тамъ на плѧцу не ставили передъ сынодомъ а не в куте, тутъ бы вамъ и печати и подъписы рукъ вашыхъ указали, не въстыдали бы сѧ вамъ въ ѡчы правду мовити, часъ и месце где сте то справовали, припоменуть и власнымъ писмомъ вашимъ, и светьками на васъ того довести и поконатъ. Але же сте свѣтомъ поколотили, про то не мели єсте ѡчью до другихъ показатъ, а ку тому на тыє заѡчные суды вашы смотрите што мовило 30 собору Карьѳагенъского четверьтого, судии церковныє нехаи стерегутъ сѧ того, абы в небытности албо заѡчьне того ѡ кого справа идеть сказу не чинили, бо сѧ в ни во тшо таковыи судъ ѡберънеть. Хто ж єще з вами тыє декрета чинилъ, речете аръхимандритове игуменове презвитеры и дьяконы, то вже подобно якоєсь новоє правило з Грецыи прылетело до васъ, же такъ маєть ѡ пакъ постопнѧхити, мирѧнинь диякона, дияконь презвитера, презвитеръ єпископа, а єпископъ митрополита своєго. А чому жъ бы и митрополитъ патрыѧрхи не мель скинути, то такъ по вашому, бо неновина то в Кгрецыи, такъ же се власне стало и светому Златоустому ѿ єго поповъ, ѡ што Инноцентии Перъшыи папа, и цесара самого с цеваровою и все духовеньство заклѧлъ. Але у православныхъ католиковъ не такъ. Слухаи што Игънатеи светыи учень апостолскии, до смирьнѧнъ в листе девѧтомъ ѡ порѧдьку церъковномъ мовить.

Если таковыи годенъ суду, которыи повставаетъ противъ царѧ, альбо которыи доброе постановенье правъ кгвалътитъ што розумеете, яко далеко тѧжъшому каранью подьлегаеть, которыи безъ єпископа што усхочеть делати, згоду торьгаючы и слушныи порѧдокъ мешаючы, и далеи мовить, про то слушныи порадокъ нехаи межи вами будеть, миране нехаи будуть подъдани дъяконови, дъяконъ презвитореви, презвитер єпископови, єпископъ же Христу, яко и Христосъ Ѿцеви.

Але милыє велебъныє судьи ачеи позадерьжи те сѧ єще з отьправою, паметаючы на правило четверътоє собору Сарьдикеиского, котороє такъ мовить.

Єпископа изверъжена суща и крепѧще сѧ и глаголюща, яко не по праву єсть судь, аще римъскии папа не повелитъ не поставити въ его єпископии инаго, то ибо разъсмотрить изьверьжениє или посолъники или грамотами. Смотрите жъ єще и третего правила, собору Сарьдикеиского ѡ судахъ папежъскихъ. Але то у васъ ни за што, волите вы же васъ Махометь судить, и тотъ кого ѡнь вам подаєть аниж ли пастыръ Вселенскии церъкви Христовы, до которого и сами патриѧръхове утекали сѧ у кривдахъ своихъ, чого маєшъ жывыи ѡбраз в Зълатоустомъ и въ иньшихъ патриѧръхахъ доведаєшъ сѧ, читаи ѡдно лето письцы церковныє, а єсли же ѡ попы идеть, которыхъ єсте при собе немалую личъбу мели, большеи ихъ было на сыноде Никеискомъ, а предъ сѧ ни ѡдного в реєстръ не вписано. Ѡдно триста и ѡсмънадесѧть светыхъ ѡтець, не поповъ, але єпископовъ, такъ же и на кождомъ сыноде такъ Вселенъскомъ, яко и поместномъ, хотѧ безъ похибы были тамъ и презвитерове, ѡднакъ ихъ в почеть не писано, толко самыхъ єпископовъ которыє правительми сыноду были, бо не до поповъ речоно в деѧхъ апостольскихъ, ани до мирских людеи, деѧн 20, внимаите убо собе и всему стаду в немъ же васъ Духъ Светыи постави єпископы, пасти церъковъ Божию, єя же снабьде кровию своєю. А єсли которого презвитера альбо дъякона уписано где, ино альбо же былъ посломъ ѡдь которого єпископа, альбо мель што в порученью на сыноде ѿ єпископовъ, про то жъ можете сѧ не хлубити великостию поповъ своихъ, не кладу в почеть заклетыхъ, банънитовъ, збегов и иныхъ негодныхъ, показало бы сѧ ихъ немало где бы сте сѧ были споломъ зошли а въ ѡчы собе глѧнули которыє ижъ межи нами местьца не мели, и у васъ ничого по нихъ было, але єсли геретикове мели местьце, а чому и тыє не мели мети, добра ваша.

Свецъкихъ людеи, ѡсвецоныхъ, кнѧжатъ, и пановъ зацныхъ, врѧдниковь, и шлѧхты учтивое якого жъ кольвекъ стану не тыкаю, яко не належныхъ до тое справы, волно то было ихъ милостѧм и прыєхати на тоть сынодь, и не прыехати.

Але єсли бы которыи зъ ихь милости, чого не деръжу, хотелъ собе взглѧдомъ того суду, што колвекъ зверхъности привлащать, розумеючы же теж до того належать.

Неспречаючы сѧ зъ жаднымъ зъ ихъ милости, только на пересторогу ѡдну речь, помети годную штомъ читалъ в книгахь сынодовыхъ перъвыхъ, листу, сл҃е [235], в предословии собору Никеиского перъвого, ѡ ѡномъ светомъ, и христиѧнине, першомъ цесару Костенътине Великомь, повемъ што сѧ власне до тое теперешное справы прыточити можеть.

Нашто бы всѣ миръские люде мели паметати, а въ справы собе не належьные невтручати сѧ. А тутъ слухаи што пишетъ.

Але на томъ сыноде поступку цесаръского, не здасть ми сѧ замовьчати, або вемъ коли зо въсихъ праве краинь зъєхалися єпископове, и яко посполите бываєть, з розныхъ причынь почали сѧ посваръки межи ними, утекали сѧ часто до него, кождыи з нихъ зособна подавали єму жалобницы, скаръкги, и выступки, ѡдинъ другого прекладали и большеи до таковыхъ речеи аниж ли до того длѧ чого сѧ зъєхали были, прихилѧли умыслы свое, але ѡнь видечи же длѧ тыхъ посварьковъ, зволокало сѧ то на чомъ все належало, назначилъ день певныи єпископомъ до преложеньѧ жалобъ ихь, єсли бы сѧ которыи здалъ якую мети, и усевшы на месьцу своємъ взѧвъ ѿ всихъ жалобницу которыє за пазухою маючи, а на што бы в нихъ было хотечы читати, реклъ до єпископовъ, Панъ Богъ васъ поставилъ иереими, и далъ вамъ власть надъ нами насъ судити, и длѧ того вы насъ слушне судите, але сами ѿ людеи не можете быти сужоны, про то Бога самого розъсудьку межи вами ѡжидаите, и вси тыє ваши посварьки якиє колъвекь суть до ѡного Божого узнаньѧ заховаите, бо ижъ васъ Панъ Богъ далъ намъ за боги, непристоит абы человѣкъ боги судилъ, ѡдно тотъ самъ ѡ которомъ написано, ѱаломъ 81, Богъ ста в о соньме боговъ, посреде же Богъ розъсудить.

И длѧ того давши посварькомъ покои, ѡ тыхъ се речахъ безъ усѧкого розьрозненьѧ умысловъ, намовлѧите которые до веры належатъ, токгды вымовилъ все ѡныє жалобницы и скарькги ихъ казалъ спалити, абы никому ѡблудьность и ненависть и ѡбъмовиска иєреискиє ведомы не были.

А єсли же на томъ мало, слухаи же другого цесара хрестиѧнского, Ѳеѡдосиѧ Меншого што пишеть до собору Єѳеского посылаючы ниякого зацьного пана радного своєго Каньдидияна, и такъ межы иньшими словы мовить.

А про то Канъдидиѧнови предънеишому з набожнеишои челѧди нашое, на тоть соборъ светыи єхати казали єсмо, а ведже подъ таковымъ правомъ и способомъ, абы в жадъные споры и гадьки ѡколо веры не вдавалъ се, бо не пристоинаѧ речь єстъ єсли бы которыи в реестръ светыхъ єпископовъ не былъ уписань, жебы сѧ церьковнымъ справамь и порядъкомъ мелъ премешкивать. Смотри жъ брате милыи якого же сь кольвекъ стану єстъ, яко тыє светые христиѧнъские цесари, хотѧ жъ могли судити и карати выступныхь, яко будучы помазанъцами Божыми, и маючы вольное панованье надъ ними, а предъ се не смели се того важити ведаючы яковаѧ єсть поважность становъ духовьныхъ, а звлаща єпископъскихъ.

Ѡдалъ бы то Панъ Богъ жебы теперешние костеньтинове которые ѿ Бога преложеньства мають свецъкие, яко назвиска, такъ и ѡбычаевъ ѡного светого Костенътина Великого наследовали, подобно бы и меньшые з нихъ прикладъ беручы такъ глубоко не забрыли, и рыхлеи бы намъ з одверъсарми нашыми згода дошла, але моценъ Панъ Богъ из неподобъных подобные речы учинити, быле геретикове не перескажали, которыхь большеи слухаемь, аниж ли правоверьныхъ христиѧнь. А васъ другихъ людеи простыхъ которыє cѧ мешаєте межи зацьными и шлѧхецъкими станы, покинувшы ремесло свое, шило и дратьву, на што васъ Панъ Богъ поволалъ, и хочете те ж церьквами и духовенъствомъ радити, втручаючи сѧ не въ своє речы. Ѿсылаю васъ до варъстатов вашихъ, пильнуи кождыи своего поволаньѧ абыс ремесла не забылъ, а єсли ть идеть ѡ спасениє, слухаи же старьшихъ своихъ дома седечы, не бегаючы по свету и не буньтуючи людеи хрестиѧньскихъ, бо лепеи ведаєть пастыръ што ѡвьцы здорово, а не ѿступуи пастыра бо певне будешъ у волка в зубехъ, а ижъ снать межи вами некоторыє наидуют сѧ такъ незбожныє и запаметалые же смеють вголосъ блюзнити, а Пана Бога ѡ свою згибель просити, жебы сѧ достали подъ моцъ турецькую, толко жебы вами не папежъ але патрыѧрхове рѧдили. Ѡ проселетое запаметалоє серьце, ѡ вшетечънаѧ губо, не ведаєшъ чого просишь. Розъгневавъшы се на блохи кожухъ хочешъ спалити, альбо докучилъ вамъ покои, докучила волность хрестиѧньскаѧ, же з роскоши и зъ своеє воли не ведаєшь што плетешъ, затули уста злоречивыє и незбожныє, утъни радъшеи зубами тотъ спросныи єзыкъ свои, ижъ коли смелъ такъ брыдливоє слово вырыгнути, але видимъ то добре же на то давно Богу зароблѧєте своими незбожніми справами. Ѡдно жъ Пан Богъ дольго терьпеливыи много милостивъ, а чеи васъ не выслухаєть, а длѧ васъ злыхъ и упорьныхъ, не дасть достоѧниѧ своєго на поруганьє языкомъ, борьздеи васъ єсли сѧ не ѡбачите и не покаєте бесъ побереть, а то што Панъ Богъ ку чъти а ѳале своєи светои, и ку розмноженью церькви католическоє справить и сконьчити рачилъ, вечьне зостанеть. Не преможеть ѳалшъ правды, не премогутъ дъяволъскиє рады и ростырки, справъ Божихъ и згоды хрестиѧнъскоє, за которою речы малыє великими уростають. А зу незгодою и ростыркомъ, и на болшие упадають, ачеи ѡбратить сѧ болезнь ваша на главу вашу, и неправда ваша на васъ самыхъ ѡбалит сѧ.

Ведаємъ тежъ добре яко некоторыє незъбожныє вестоношъкове ѡсобы легъкиє будучи з Берестьѧ новины якиєст дивныє розъсевали, и каръ телюши полныє неправды по местахъ и местечъкахъ межи людеи хрестиѧнъскихъ на ѡгиду тое єдиности кидали, змысливши явъныє потвары на ихъ милости пановъ сенаторовъ, пословъ єго Королевъскои милости, якобы приводечи сторону противную до тоє єдиности, перъвеи ѡбетницами, упоминьками, а потомъ кгды ихъ тымъ не могли уловити ино лаяньємъ ѳуканьємъ, и забианьємъ грозечи.

А митрополитъ якобы в росьпачъ упавши з владыкою Полоцъкимъ, сыноду своєго ѿбечы и до противное стороны поити мелъ, которыхъ яко бы владыка Володымеръскии ажъ угонити и погамовати мелъ, и много иньшихъ плетокъ которыє и ушъю людъскихъ благочестивыхъ негодны.

Толко на ѡдну баламутъню которую поведають, здало ми сѧ ѿповедеть, не ихъ потвары явнои справуючы сѧ, але людеи хрестиѧнъскихъ з мниманьѧ вывести абы правду истинную ведаючы кламъству не верили, дають снать прычину длѧ чого до церъкви соборьноє не збирали сѧ, якобы владыка Володимерскии мел уберы и ѡхеньдозъства ѡлътаровыє, вси на папескии строи ѿменити, антимисъ с престола скинути, и камень на престоле положити, а потомъ єзуитовъ напущати до церкви и ѡдному єзуите службу Божию допустити служить, которыи кгды служилъ заразомъ Богъ чудо показалъ, же в келиху вино у воду претворило сѧ, и якобы єзуита злѧкъши сѧ ѿскочилъ ѿ престола, а потомъ и вси якобы се полекати и потрывожити мели, а правда знаете вже теперъ же єсте не на местьцу власномъ, пристойномъ соборовали, ѡтожъ рали бы єcте тотъ явныи блудъ свои, же єсте в дому геретическомъ советовали, чымъ кольвекь покрыли аижъ правды не стало, ѳальшомъ нароблѧють.

Але же быхъ чительника не бавилъ дольже, слухаи повемь ти ѡ тых чудах, и хто былъ которыи службу Божью служилъ.

Такъ маешъ ведати межы инъшыми добродеиствы своими, которыи показовалъ владыкамь в Риме папежъ на вечную паметку хути своеє противъ народови рускому умыслиль в тыхъ краехъ панъства єго Королевъское милости, коштом своимъ коле имъ альбо семинариумъ, на колько десѧть ѡсобъ ѳунъдовати, в которомъ бы млоденъцове руские учили сѧ языка словенъского и греческого, а звлаща у писме светомъ, и ѡколо порадку и справъ церьковныхъ, с которыхъ абы потомъ на стань духовныи годные и учоные люди въступовати могли. А такъ длѧ заложеньѧ того семинарыумъ, а потомъ и длѧ справованьѧ в немъ за прозбою тыхъ же владыковь послалъ тутъ взѧвьши з греческого семинарыумь што єстъ в Риме, презвитера ѡдного греческого неякого Петра Арькудына всимъ грекомъ такъ у Венецыи яко и в Цыпре добре знаємыи, которыи в Рымє будучи пры томъ семинарыумъ церъкви греческоє светого Ѡѳанасиѧ, черезъ колконадцать летъ службу Божию по греческу то єстъ литоръгию светую уставичъне служивалъ, што всимъ которыє тамъ бывали добре ведомо єстъ тотъ же то грекъ презвитерь яко вже не разъ в тыхъ краѧхъ службу Божью приехавъши служивалъ, коли мель литургию светую на початьку закладаючи агнецъ и ѡправуючи просьѳуръмедию, коли наливалъ в келихъ товаришъ єго, што єму послуговалъ, ѡмысливши се и не коштовавши подаетъ єму коновьку сребръную, которыхъ было две ѡднакихъ, и довнимаючи вино подалъ з водою, сєи тежъ не смотречи што было налилъ в келихъ первеи воды достатокъ, а потомъ творечи вода взѧлъ другкю коновочьку з виномъ и въпустилъ вина место воды ледве зо тры кропочъки, яко посполите бываєть у бычьныхъ свещенниковъ немъного наливають воды абы вино не стратило смаку, а звлаща и повторе єще укропъцу наливати потреба, и также ѿправивши проскуръмедию порадъкомъ своимъ службу Божью ѿправовалъ, и коли пришло до причащеньѧ принесеть до усть скошътуєть ажъ ти щираѧ вода, такъ ижъ ани паху, ани смаку винного не было, бо не мело кого быти килька кропокъ а воды по два кроть наливано, и пры просъѳуръмеди и коли укропецъ вливалъ заразомъ ѡбачивши то, же сѧ помылою стало, и ку тому не была бы то соверьшеннаѧ жертва водою голою безъ вина служити, казалъ собе подати ѡную коновочъку з виномъ, и показала сѧ помыла, бо коновочъка польненька єще была вина якожъ сперъву наготована и заразомъ другии келихъ взѧвши налилъ тамъ вина, и посветивши слвами Христовыми которыє надъ келихомъ мовѧтсѧ, влилъ ѡноє вино у перъшую воду, и служъбу своимъ порадькомъ ѿправовалъ. И такъ же тотъ чудъ доконьчилъ сѧ же вода водою была, а коли вина в нее влито теперъ же виномъ стало сѧ. А што поведають якобы мелъ быти аньтимисъ скинень, то щираѧ неправда и потваръ на владыку Володимеръского, толко то правда же ѡльтаръ былъ покрытыми новымъ покровомъ котороє папежъ давровалъ церъкви Володымеръскоє, и з уберомъ арьхиєпископьскимъ сакомъ названымъ на альтамъбасе бурънатномъ, на што и листъ свои далъ, абы на паметку того же в Рыме были тыє два владыкове, Володымеръскии и Луцъкии, такъ же и наследъники ихъ ѡдь того часу вже не у ѳелонехъ але в сакахъ служили, бо єсли патрыѧръсе вольно было на Мосъкве патрыѧръху постановить што неслыхана. А што жъ сєму не мело быти волно не врадъ але уберь єпископъскии на арьхиєпископъскии пременити.

Смотры жъ тутъ брате милыи того ихъ чуда єсли то єстъ што чудомъ назвати, же вода у воду пременила сѧ, альбо по старому водою зостала яко была налита. А замало розмаитыхъ прыпадъковъ траѳлѧетъ сѧ в церъкви, яко се раз было траѳило же попь у переносу ступаючы, через люди повалилъ сѧ з дары, и все пролиль. Але пытаю где бы се таковыи прыпадокь яко тому грекови трафилъ сѧ попови рускому, которыи бы не ведалъ яко в таковыхъ прыпадкахъ поступовати, бо ѡ томъ науки в требъникахь не знаидешь, штобы тотъ чинилъ, певне бы тамъ было чудо большое, бо вместо крови Панское котораѧ з вина претварѧеть сѧ, напиль бы сѧ воды голое, а замало трафлѧетъ сѧ, же часомъ келихъ переверънетъ неѡбачки, часомъ ѡцету въместо вина нальетъ, або єлею, яко се ѡдному великому и зацъному каръдыналови чоловеку светому притрафило, ижь вместо вина клерикъ налилъ ѡливы што длѧ какганъцовъ ховано, альбо робакъ якии плюгавыи албо паукъ ядовитыи влезетъ у келихъ, албо мышъ агнецъ украдеть з дыскоса, а єсли же єще прежесвещеньныи коли не годитъ сѧ просѳурмидии ѿправовати, а боръзеи то у насъ можеть се трафить, аниж ли у нихъ, бо у нихъ перед ѡчима спочатку ажъ до конъца, а у насъ стоитъ часомъ добрую филю на жерътовьнику, штобы туть чиниль в таковыхъ прыпадькахъ попъ рускии которыи того не ведаеть. Ѡтожь коли того не ведаете вестоношкове яко таковымъ припадкомъ забегати, не называи же того чудомъ што се помылою стало, воды было налито, вода тежъ и показала сѧ. Але большыє чуда бываютъ инъдеи мало неуставичне у церъквахъ рускиххъ посельскихъ альбо где в местечкахь малыхь где далеко повино посылати, ѡ чомъ мы добре ведаємъ, ижъ попъ часомъ купивъшы вина зъ якую кварту, ховает через цалыи рокъ, с которого потомъ щи ѡцотъ учинить сѧ, альбо сплеснеетъ альбо такъ выветреетъ, же ани смаку, ани паху винного в немъ не будетъ, и до устъ брыдъко прынести, а предъ се тымъ служить водою намагаючи, абы ѡцъсту не чуть а подъ час колы оцту не станеть и дрожьчи на дьне водою пополоскавши служать, не въспоминаю ѡвого же снать многиє мовѧть, где бы вина не было тогды зъ яблыка квасъного сокъ вытиснувши служити кажутъ, и тому я веру же то бываєть у поселъскихъ поповъ которыє владыкъ своихъ ани знають, бо волить тот грошъ на горельце пропить аниж ли вина купить, а єсли

єще ѿ места где вина шукають далеко, а єсли жь єще и горлькою которою тежь виньцомъ называють служать, то пакъ вже надъ чудами чудо. А такъ православныє хрестиѧ не длѧ Бога не верьте таковымъ явнымъ баламутомъ которыє рады бы и с пекла потвары выдрали, чимъ бы ѡдно тую згоду и єдиность людѧмъ ѡгидити могли. А што мовѧть ижъ єзовитовъ в церьковъ напущали, далъ бы то Пан Богъ жебы частеи до церьквеи вашихъ єзоитове ходили и вашыхъ блудовъ догледали, азали бы с те сѧ рыхлеи ѡбачили, а ѡ нихъ порадьку лепшого яко се в церьквахъ справовати научили, а што имъ за пригану даєшъ, азали несуть христиѧне и ученьшиє далеко ниж ли вси попы греческиє, и з владыками, изали не тогожъ Бога во Троицы єдиного што и вы вызнавають, изали не лепеи анижь ли вы сами церемонии церькви греческоє с писма светыхъ ѡтецъ греческихъ ведають, бо ихъ частеи читають анижь ли вы, изали веры вашоє и церемонии церькви светоє каѳтолическоє не лепеи боронеть ѿ геретиковъ кажучи, пишучи, заставлѧючи сѧ за православную веру, а предъ се того слепи єсте, але то упатруєте што у васъ и геретикомъ вольно до церькви прыити и припатровати се церомониѧмъ вашимъ.

Горьшаѧ то пановы милы єст же сте вы в божьницы геретыческои соборища своє чинили, литорьгию светую тамъ ѿправовати смели єсте, ѡпустивьши такъ много церьквеи которыхъ ту жъ подъ бокомъ мели єсте, єсли сте то ѡ мурованои розумели жебы поскверьнена была, што єcтъ неправъда щираѧ, ино другиє церкви были, тамъ было служьбы Божое слухати альбо своимъ казать ѿправовать, не боронилъ бы вамъ того нихто, коли бы сте ѡ то просили, алесте взгоръдивьшы домомъ Божымъ, домомъ молитвеньнымъ, волели єсте влезъти до верътепа разъбоинического. А тамъ зъ ариѧнами, з новокръщенъцами набоженъства свое ѿправовати, запомневьшы срокгого заказу церьковьного, ижъ до таковыхъ домовъ людемъ каѳътолическимъ и входити не годило се, не только службу Божую в немь служити, але прави єсте, бо сте мели при собе протосигела и двохъ владыкъ, волно там было и до жыдовъскоє школы влести, а водою покропивьшм тамъ служити, але и по вашомъ ѿєзьде верьтепъ верьтепомъ ничого вода не помогла. Повете ж ми, мель ли тотъ вашъ прото синькгелъ зрадьца хрестѧнъскии, якимъ єго господаръ менуєть такъже и тыє владыкове вашы, такую моцъ ламати правила апостолъскиє и светыхъ богоносныхъ ѡтецъ постановеньѧ, которыє въ своихъ власныхъ привилѧхъ маєте. А засте запаметали што мовѧть правила апостолъские 45 и 63, хто бы вшолъ до соборыща жидовъского альбо поганъского и геретыческого, и помолиль се с ними єcли мирьскии да ѿлучить сѧ, а єсли причетьникъ да изъверьжеть сѧ, и далеи мовить, аще ли же в дому токмо помолить сѧ со єретыки, єпископъ, или презвитерь, или дъяконь, да ѿлучить сѧ, тоє жъ мовить и Лѧодикейского Собора, правило, л҃г [33].

Слухаи же яко таковыє домы называетъ правило 71 собору Каръѳагеньского четверътого, геретические соборища не сутъ церъковью, але соборища дъѧвольские, того жъ и правила 72 заказуеть, ку тому Кганъкгреньского собору правило 6 мовить, єсли хто ѡпрочъ соборное церъкви, соборыща якие чинитъ и тамъ справы церъковьные ѡтъправуєтъ, таковыи нехаи будетъ проклѧтыи, чытаи же єще собе правило, 35, собора Лѧѡдыкеиского, што ѡ таковыхъ пишеть которые мимо церъковъ Божию где инъде собираютъсѧ на молитвы и пениѧ, а єсли же в домахь хрестиѧнъскихъ непоскверъненыхь безъ воли єпископа ѡное страны не повелеваеть жерътвы приносити, яко далеко большеи в соборыщу геретическомъ заказано и вьходить, не толко справы церьковьныє ѿправовать, не свецоною то водою скропить, яко сте выучили, ведаєте яко великиє церомонеи бывають надъ храмомъ ку чьти и хвале Божои, умысльне на то збудованомъ. А што жъ такъ надъ таковымъ домомъ где соборыща геретычєскиє бывають, не водою тамъ было потреба ѿбыть, власне яко бы сте тежъ хлевь свинии покропили, а по ѿшествию вашомъ, ѡпѧть свиньи до хлева вълезьли, ѡ тожъ не дивъ то же вода водою стала сѧ. Але большыи то дивъ же и протосенькгелове и єпископове и въсе духовенъство ваше, иле васъ тамъ было вси єсте послепъли же сте правилъ тыхъ не видели.

А праве яко єванъгелие пишетъ коморы толко цедите, а вельблюда польмаете, Матѳеи, 23, в чужомь ѡку порохъ видите, въ своемъ ѡкрутного и великого траму не бачите, Матѳеи, 17. Але не треба се дивовати, певне учстивыи чоловекь статечни не розсѣваль би таковыхъ новинъ плонъныхъ, але якись витаноша и попужница благаѧ, которому тежъ и верити не годитсѧ.

Друковано у Вильни, Року Божего 1597.