Описанье и оборона събору руского Берестейского/Оборона/5

ОБОРОНА СЪБОРУ БЕРЕСТЕЙСКОГО
Аўтар: Пётр Скарга
1597

Прапануем да спампаваньня!

Ижъ тое зверхности своее Римскій бискупъ уживалъ надъ всего света костелы — сведоцство Кгрецкихъ докторовъ.

Роздѣлъ 5.

Свежо скоро по апостолскихъ часехъ, около року Божого сто деветдесятого, Викторъ папа мученникъ росказалъ церквямъ въ Азын, абы Великодня не светили зъ Жидами 14 дня по настанью месеца першого, але въ неделю, за тымъ днемъ идучую. Чого кгды учинить не хотели, онъ ихъ выклялъ и духовною моцъю покаралъ. То пишеть Евзебий Грецкий (учитель) (въ книгахъ пятыхъ гистор. глава 24). Правда, ижъ его сквапливость приганилъ Иренеушь; але моцъ и владность признавалъ.

Аѳтанасія, Александрийского патрыярху, неслушне зъ столицы одъ Арияновъ зложоного, папа Июлий привернулъ. То пишеть Созоменесъ (въ книгахъ третихъ, глава 7).

Теоѳиля, такъже Александрейского патриярху, Инноценцыушъ Перший, папа (Римъский), зъ столицы скинулъ, о кривду светого Златоустого; и Аркадыуша цесаря, для тоежь причины, и жону его Овдосию выклялъ. То пишеть Кгрецкий Никифоръ (книги 13, глава 34).

Целестымъ, папа (Римский), Царогородского патрыярху Несторыя выклялъ и зъ столицы зложилъ (Соборъ Ефесский, Кирилъ).

Леонъ 1, папа (Римский), Дыоскора Александрийского и Ювеналія, Ерозолимъского патрыярху, яко геретыки, выклялъ и зъ столицы зложилъ (пишеть Никиѳоръ Кгрецкий). И Өнликсъ папа Петра, Антиохийского патрыярху, выклял и зложилъ (тотъ же Никифоръ пишеть).

Агапитъ папа Антимия Царогородского, для герезы, самъ до Царогороду приехавши, з столицы зложилъ, а самъ рукою своею Менну на тоежъ патрыярховство посветилъ и всадилт, хотя цесарь Юстинианусъ за Антымомъ вставяльсе. То пишеть Зонаразъ (въ животе Юстыниановом).

Осмъ иныхъ патрыярховъ Царогородъскихъ выличаетъ Миколай Перший, папа (Римъский), которие Римские бискупы, для герезый, зложили, а на ихъ местца правоверныхъ поставили. То знать, ижъ моцъ и зверъхность надъ ними мели.

Дамазъ папа (пишеть Ѳеодоритъ Кгрецкий, гистор. глава 23) зложилъ Өлявиана, патрыярху Антиохейского, зъ его столицы, и муселъ ездить до Рыму, справуючисе о геретыцъство.

Хто хочетъ болшъ тыхъ прикладовъ уживанья зверъхности папеское надъ (патриярхами) бискупы всего света, читай книжки о томъ по Польску писаные: «О раде костелномъ».