Якуб Колас (Тарас Гушча). Збор твораў/НА ЛУЗЕ

З пляцоўкі Вікікрыніцы
Jump to navigation Jump to search
Ноч прад навальніцай НА ЛУЗЕ
Аўтар: Якуб Колас
1910
Вярба


НА ЛУЗЕ

Добра ў лузе ў час палудны!
Лёгка там дыхнуць!
Хмаркі белыя марудна
За лясы плывуць.

Ветрык краскі чуць калыша,
Травы шалясьцяць.
Луг зялёны жыцьцём дыша -
Конікі трашчаць.

Ў лозах шчэбет ня сьціхае,
Шум стаіць і сьвіст,
Ў яркім бляску спачывае
На ракіце ліст.

Сьпевам-гоманам і звонам
Поўніцца ўвесь луг,
І дрыжыць над ім, зялёным,
Жыватворчы дух.

1910 г.