Якуб Колас (Тарас Гушча). Збор твораў/ЗА ПАДАТКІ

З пляцоўкі Вікікрыніцы
Jump to navigation Jump to search
Песьня над калыскай ЗА ПАДАТКІ
Аўтар: Якуб Колас
1909
Доля батрачкі


ЗА ПАДАТКІ

Колькі ўжо раз за падаткі
Стараста пужае!
Ох, няхай іх! горка з імі,
Хто таго ня знае!

Аж тут пісар прыяжджае
Разам з старшынёю...
Ой, нічога-ж не парадзіш
З горкаю бядою!

— Пачакайце, калі ласка! -
І — бух ім у ногі!
А назаўтра я Красульку
Пацягну за рогі.

Зарыкала так жалобна
Бедная жывёла,
І мне сэрца гэтым рыкам,
Як нажом парола.

Жонка плача, лемантуе...
Гэтак па дзіцяці,
За труною йдучы, плача
Хіба толькі маці...

Я йшоў збоку, і здушылі
Горла мне залозы.
Ў поле вышаў — паліліся
З вачэй самі сьлёзы.

1909 г.