Якуб Колас (Тарас Гушча). Збор твораў/ВЕСНАВЫЯ ХМАРКІ

З пляцоўкі Вікікрыніцы
Jump to navigation Jump to search
Раздум'е ВЕСНАВЫЯ ХМАРКІ
Аўтар: Якуб Колас
1911
Пагуляў на волі


ВЕСНАВЫЯ ХМАРКІ

Сінім стэпам-даліною
Ходзяць хмаркі веснавыя,
Чарадою, грамадою
Сакавітыя, густыя.

Ой, вы, хмаркі, неба дзеці!
Як вы сэрцу майму мілы!
Носіць вецер лёгкакрылы
Вас, любыя, па ўсім сьвеце.

Люба мне, як думкай божай
Ціха зьвісшы над палямі,
Вы гугукнеце часамі
Громам-грукатам прыгожым.

Як маланка узаўецца,
Блісьне стужкай агнявістай,
І як песьняй галасістай
Вам зямелька адгукнецца.

Ліне дожджык, даль завесіць
Белай сеткай срэбратканай,
Цёплы дождык і жаданы
Гоман ўзьніме ў полі, ў лесе.

А зачуўшы голас грому
Селянін з сахой на ніве
Усьміхнецца вам шчасьліва,
Стаўшы важна, нярухома,

Бо ваш гром для вёскі сына -
Лепша музыка на сьвеце...
Ой, вы, хмаркі, сонца дзеці!
Не пакрыўдзьце селяніна!

1911 г.