Шчасьце (Купала — Мы гонімся часта за мараю блуднай…)

З пляцоўкі Вікікрыніцы
Jump to navigation Jump to search
Шчасьце
Верш
Аўтар: Янка Купала
18.VIII.1906
Крыніца: http://rv-blr.com/literature/2663#83



Мы гонімся часта за мараю блуднай,
        Якая ў нас шчасьцем завецца.
Дый трудна яе нам злавіці, ой, трудна,
        Хоць блізка, туж блізка, здаецца…

Аднымі рай-шчасьце завецца багацьце,
        Што сьвеціцца грошы машонкай;
Другімі — парадак і згода у хаце,
        А іншымі — ўдалая жонка.

Той рвецца да славы шырокай, вялікай.
        Той — жыці нязнатна, як дзеці;
Той — песьняй азвацца нясвойскай і дзікай,
        Той — родную думку запеці…

І роім у думках так цэлымі днямі,
        Ды шчасьце ня роіцца ройна…
А сьлёзы другіх, што ліюцца прад намі,
        Ці ж могуць даць спаць нам спакойна?..

(18.VIII.1906.)